აეროსტატის ინციდენტის გამო აშშ-მა სახელმწიფო მდივნის ენტონი ბლინკენის ჩინეთში ვიზიტი გადადო. ინფორმაციას ამის შესახებ გამოცემა Bloomberg-ი ამერიკელ მაღალჩინოსნებზე დაყრდნობით ავრცელებს.

როგორც ცნობილია, ენტონი ბლინკენი ჩინეთში ვიზიტს შემდეგი კვირის დასაწყისში აპირებდა და დაგეგმილი ჰქონდა შეხვედრები ჩინეთის პრეზიდენტთან სი ძინპინთან და საგარეო საქმეთა მინისტრთან ცინ განთან.

თუმცა, გამოცემის თანახმად, აშშ-ის საჰაერო სივრცეში ჯაშუშური აეროსტატის გამოჩენის შემდეგ, რომელიც პენტაგონში გადაწყვიტეს, რომ არ ჩამოეგდოთ, ამერიკელმა მაღალჩინოსნებმა გადაწყვიტეს, რომ ვიზიტი არასწორი სიგნალი იქნება.

აღინიშნება, რომ ჩინეთმა ინციდენტის მოსაგვარებლად გარკვეული ნაბიჯები გადადგა. კერძოდ, ჩინეთის საგარეო საქმეთა სამინისტრომ განაცხადა, რომ “წუხს, რომ მისი კონტროლის მიღმა არსებული ძალების ქმედებების გამო სამოქალაქო აეროსტატი აშშ-ის საჰაერო სივრცეში შევიდა”.

ჩინეთის საგარეო უწყების თანახმად, აეროსტატი კლიმატურ კვლევებს ატარებდა.