საქართველოს ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა, რომელიც სამუშაო ვიზიტით ლიეტუვაში იმყოფება, ტრანსპორტისა და კომუნიკაციების მინისტრ მარიუს სკუოდისთან ორმხრივი შეხვედრა გამართა.

ამის შესახებ ინფორმაციას ეკონომიკის სამინისტრო ავრცელებს.

უწყების ცნობით, შეხვედრაზე ტრანსპორტისა და კომუნიკაციების სექტორებში თანამშრომლობის პერსპექტივები განიხილეს როგორც ორმხრივ, ასევე რეგიონულ და საერთაშორისო ფორმატებში. მათივე ინფორმაციით, ევროკავშირთან თანამშრომლობის გაღრმავების აუცილებლობას განსაკუთრებულად ხაზი გაესვა.

„აღინიშნა, რომ რეგიონში მიმდინარე პროცესების ფონზე, დღის წესრიგში დადგა ტრანზიტის მარშრუტების დივერსიფიკაციის აუცილებლობა და ტვირთების მიწოდების ალტერნატიულ მარშრუტებზე მოთხოვნა გაიზარდა. ქართულმა მხარემ შუა დერეფნის სატრანზიტო შესაძლებლობებსა და ქვეყნის სატრანსპორტო ინფრასტრუქტურის განვითარების პრიორიტეტულ მიმართულებებზე ისაუბრა. აღინიშნა, რომ საქართველო დაინტერესებულია ევროპა - აზიის დამაკავშირებელი ე.წ. შუა დერეფნის მეტად განვითარებით და მარშრუტის სხვა მონაწილეებთან ერთად, სატრანზიტო ტვირთების მოსაზიდად აქტიურად მუშაობს.

მნიშვნელოვანი სატრანსპორტო - ლოგისტიკური პროექტების ჩამონათვალში, ქართულმა მხარემ ანაკლიის ღრმაწყლოვანი ნავსადგურის პროექტი დაასახელა, რომლის მშენებლობაც ქვეყნის მთავრობის პრიორიტეტებს შორისაა.

მხარეებმა, ასევე, სამოქალაქო ავიაციის სექტორში თანამშრომლობის გაღრმავების შესაძლებლობა განიხილეს, მათ შორის, როგორც მგზავრთა გადაყვანის, ისე კარგო მიმართულებით. აღინიშნა, რომ ორი ქვეყნის ეკონომიკური ურთიერთობების გაღრმავებას პირდაპირი ავიამიმოსვლის დანიშვნა თბილისსა და ვილნიუსს შორის დამატებით სტიმულს მისცემს.

ყურადღება გაამახვილეს ტელეკომუნიკაციებისა და საინფორმაციო ტექნოლოგიების სფეროში თანამშრომლობაზე. აღინიშნა, რომ ორივე ქვეყანა მნიშვნელოვან ინვესტიციებს ახორციელებს ქვეყნების ინტერნეტიზაციისა და ციფრული სერვისების განვითარების მიმართულებით.

ამასთან, მხარეებმა ყურადღება გაამახვილეს ციფრული სატრანზიტო დერეფნის (ჰაბის) განვითარების მნიშვნელობაზე. ქართულმა მხარემ ინფორმაცია მიაწოდა ლიეტუველ კოლეგებს, რომ აღნიშნული პროექტი ქვეყნისთვის სტრატეგიულად მნიშვნელოვანია და მოიცავს, ერთი მხრივ, შავი ზღვის გავლით ევროპა - აზიის დამაკავშირებელი მაგისტრალის, და მეორე მხრივ, საქართველოში რეგიონული დატა - ცენტრების განვითარებას“, - ნათქვამია ეკონომიკის სამინისტროს გავრცელებულ ინფორმაციაში.