შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა თეა ახვლედიანმა, აშშ-ის საერთაშორისო განვითარების სააგენტოს (USAID) დირექტორთან ჯონ პენელთან სამუშაო შეხვედრა გამართა.
ამის შესახებ ინფორმაციას შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი ავრცელებს.
ინფორმაციის თანახმად, თეა ახვლედიანმა სააგენტოს დირექტორს სახელმწიფო მინისტრის აპარატის გასული წლის საქმიანობა და შედეგები გააცნო.
„მხარეებმა ისაუბრეს სამომავლო ერთობლივი თანამშრომლობის ფარგლებში გამოვლენილ აქტუალურ მიმართულებებზე და კოორდინირებული პარტნიორული ურთიერთობების გაგრძელების ხედვა დასახეს.
სახელმწიფო მინისტრმა აშშ-ს საერთაშორისო განვითარების სააგენტოს გაწეული მხარდაჭერისთვის მადლობა გადაუხადა. თავის მხრივ, ჯონ პენელმა დაადასტურა უწყების საქმიანობის შემდგომი მხარდაჭერის მზაობა სახელმწიფო პოლიტიკის ფარგლებში”, - ნათქვამია გავრცელებულ ინფორმაციაში.