ჩემს თვალწინ ქრება, ადამიანი დნება, მიდის და მე ამის მოწმე ვარ - ადამიანი დღეს- ხვალ აღარ იქნება და თურმე, ეს ყველაფერი სპეცდიეტის ბრალია, - ამის შესახებ საქართველოს მესამე პრეზიდენტის მიხეილ სააკაშვილის დედამ, გიული ალასანიამ ჟურნალისტებს განუცხადა.

მისი თქმით, გუშინ სასამართლო პროცესზე გაჟღერდა, რომ მიხეილ სააკაშვილი სპეცდიეტაზეა და „თურმე სიცხე და ტვინის დაზიანებაც ამის შედეგია“.

„სიცხე აქვს 37.7. სიცხე გუშინ და დღეს ხომ არ დაიწყო - ადამიანს 5 თვის განმავლობაში სულ სიცხე აქვს. გუშინ გაჟღერდა, რომ თურმე რაღაც სპეცდიეტა აქვს. როგორც ჩანს, სპეცდიეტის გამო აქვს ეს სიცხეები. ტვინი რომ აქვს დაზიანებული, ესეც სპეცდიეტის შედეგია, როგორც ჩანს. რომ ათრიეს და მალები, მარცხენა მკლავი რომ აქვს ჩამტვრეული, ესეც თვითდაზიანებით ხდება თურმე. იქიდან გამოვდივარ აბსოლუტურად დანგრეული. ჩემს თვალწინ ქრება, ადამიანი დნება, მიდის და მე ამის მოწმე ვარ“, - განაცხადა გიული ალასანიამ.

მისივე თქმით, გუშინ სასამართლო სხდომაზე, სადაც „ვივამედის“ დირექტორი ნინო ნადირაძე გამოკითხეს, გამოჩნდა, რომ ნადირაძეს რეალურ ვითარებაზე ნაკლები წარმოდგენა აქვს.

„გუშინ მოვუსმინე და აქედან გამომდინარე დამრჩა შთაბეჭდილება, რომ ქალბატონ ნინოს აქვს ნაკლები წარმოდგენა იმაზე, რაც რეალურად ხდება. სწორედ იქ გაიჟღერა სპეცდიეტამ, რაზეც არის თურმე ჩემი შვილი და თურმე ამის გამო სჭირს ის, რაც სჭირს. ეს უამრავი დიაგნოზი თურმე გამოიწვია იმ სპეცდიეტამ და საკუთარი თავის განადგურებამ - თითქოს ჩემი შვილი ამ რეჟიმშია. ადამიანი დღეს, ხვალ აღარ იქნება და თურმე, ეს ყველაფერ სპეცდიეტის ბრალია“,- ამბობს გიული ალასანია.