ზურაბ ჩხაიძე - მიხეილ სააკაშვილის კვების რაციონი შედარებით გაფართოვდა - გუშინ მიღებულმა საკვების რაციონის კალორაჟმა მოიმატა

კლინიკა „ვივამედის“ კლინიკური დირექტორის, ზურაბ ჩხაიძის განცხადებით, საქართველოს მესამე პრეზიდენტის, მიხეილ სააკაშვილის კვების რაციონი შედარებით გაფართოვდა.

ჩხაიძე ჟურნალისტებთან საუბარში იმედს გამოთქვამს, რომ ე.წ. გარე ძალები ექიმებს პაციენტთან მუშაობას დააცდიან.

„ტემპერატურა საღამოს 37,2 აღენიშნებოდა, დღეს, 37,3 აღენიშნება. ერთ-ერთი მნიშვნელოვანი ფაქტორია ის, რომ მან კვების რაციონი შედარებით გააფართოვა. მე არ ვიცი, ვინ რას გეტყვით თქვენ, მაგრამ ყოველ შემთხვევაში, რაციონი უფრო გაფართოვდა და იმედია, ეს ასე გაგრძელდება, თუ ე.წ. გარე ძალები კიდევ არ ჩაერევიან და თუ დაგვაცდიან პაციენტთან მუშაობას. გუშინ მიღებულმა საკვების რაციონის კალორაჟმა მოიმატა“, - განაცხადა ჩხაიძემ.

კითხვაზე, აღნიშნული საკვები სააკაშვილის ოჯახმა მიიტანა თუ არა, კლინიკური დირექტორი დადებით პასუხს სცემს.

„დიახ, ოჯახი ყოველთვის დაინტერესებულია მისი მდგომარეობით და ყველაფერს შეასრულებს, რასაც ეტყვის პაციენტზე მართლა მზრუნველი ექიმი, რომელსაც მხოლოდ და მხოლოდ პაციენტის ჯანმრთელობა აინტერესებს. ჩემი დიდი პატივისცემა ოჯახს, ეს შემიძლია გითხრათ“, - განაცხადა ჩხაიძემ.

ის ასევე გამოეხმაურა მიხეილ სააკაშვილის გუშინდელ სასამართლო პროცესს, რომელიც მისთვის სასჯელის გადავადებას, ან გათავისუფლებას ეხება. როგორც ჩხაიძე განმარტავს, ადვოკატები სრულიად მოუმზადებლები იყვნენ კლინიკის დირექტორის დაკითხვისას.

„სასამართლო პროცესთან დაკავშირებით მინდა გითხრათ, რომ ნინო ნადირაძემ მთელ ქვეყანას აჩვენა, რამდენად არაკომპეტენტურები არიან ამ საქმეში ძირითადი მოქმედი პირები, ვგულისხმობ ადვოკატებს. მათი კომპეტენტურობა, როგორც ადვოკატების, არ ვიცი, მაგრამ როცა სამედიცინო საქმეს ეხება, გუშინ ყველას დაანახეს სრული უვიცობა თავიანთი დარგის, რომ აბსოლუტურად გაუთვითცნობიერებელი არიან იმ დარგში, რაზეც ამ კონკრეტულ შემთხვევაში მუშაობენ. მესმის, რომ სამედიცინო სამართლის სპეციალისტებს საქართველოში არ ამზადებენ, მაგრამ როცა 9 თვის განმავლობაში ამ საქმით არიან დაკავებული, ალბათ, ელემენტარული რაღაც უნდა წაეკითხათ და უნდა სცოდნოდათ რაზე ესაუბრათ. აბსოლუტურად მოუმზადებლები იყვნენ, ეს ძალიან კარგად გამოჩნდა სასამართლო პროცესზე, საერთოდ არ ესმით არც ერთი დაავადების შესახებ. ვიმეორებ, 9 თვეა, ამ საქმეზე მუშაობენ, ელემენტარულად, ერთ-ორ ნოზოლოგიას და ტერმინოლოგიას მაინც წაიკითხავდა ადამიანი, მაგრამ ამას უნდა დრო, წიგნის გადაშლა, ინტერნეტით ინფორმაციის წაკითხვა და ადეკვატურად აღქმა, ვიდრე იაფფასიანი განცხადებების კეთება“, - განაცხადა ჩხაიძემ.

ვახტანგ ხმალაძე - თბილისის საქალაქო სასამართლოს მოსამართლე პრეზიდენტის კონსტიტუციურ უფლებამოსილებებში შეიჭრა, რისი უფლებაც მას არ ჰქონდა
გიორგი გობრონიძე - ხელისუფლება საზოგადოებასთან ბოლომდე გულწრფელი არ არის
ქართული პრესის მიმოხილვა 22.07.2024
კახეთის გზატკეცილზე „კარფურის” სუპერმარკეტი უკვე გაიხსნა
„ბიოგრაფი ლივინგი“ დეველოპერულ ბაზარზე მოღვაწეობის პირველივე წლის ბოლოს მე-4 ახალ პროექტს იწყებს
Keepz-მა ღია ბანკინგის ლიცენზია მიიღო