ჩინეთს არასდროს დაურღვევია არცერთი სუვერენული ქვეყნის ტერიტორია და საჰაერო სივრცე, - ამის შესახებ ჩინეთის საგარეო საქმეთა სამინისტროს განცხადებაშია აღნიშნული, რითაც უწყება აშშ-ის თავზე საჰაერო ბუშტის გამოჩენას ეხმაურება.

„ეს არის სამოქალაქო აეროსტატი, რომელიც გამოიყენება კვლევებისთვის, ძირითადად, მეტეოროლოგიური კვლევისთვის. დასავლეთის ქარის გავლენით და შეზღუდული თვითმართვის შესაძლებლობებით, საჰაერო ბუშტმა დაგეგმილი კურსიდან მნიშვნელოვნად გადაუხვია“, - აცხადებენ ჩინეთის საგარეო სამინისტროში.

უწყების მტკიცებით, აშშ-ში ზოგიერთი პოლიტიკოსი და მედია საშუალება ინციდენტს ჩინეთზე თავდასხმისა და შეურაცხყოფის საბაბად იყენებს.

„პეკინი არ მიიღებს რაიმე უსაფუძვლო ვარაუდს ან აჟიოტაჟს“, - აცხადებენ ჩინეთის საგარეო უწყებაში.

შეგახსენებთ, პენტაგონმა გუშინ განაცხადა, რომ აშშ-ის საჰაერო სივრცეში ჩინური სათვალთვალო საჰაერო ბურთი დააფიქსირეს. მოგვიანებით კი გაავრცელეს ინფორმაცია, რომ საჰაერო ბურთი ლათინური ამერიკის თავზეც გამოჩნდა. ინციდენტის გამო, აშშ-ის სახელმწიფო მდივანმა, ენტონი ბლინკენმა ჩინეთში დაგეგმილი ვიზიტი გადადო.