სააკაშვილის ციხეში დატოვება და სიკვდილის პირას მიყვანა, ნამდვილად სამოქალაქო დაპირისპირებამდე მიიყვანს ქვეყანას, - ამის შესახებ „სტრატეგია აღმაშენებლის“ ერთ-ერთმა ლიდერმა პაატა მანჯგალაძემ ჟურნალისტებთან განაცხადა.

მისი თქმით, ყოფილ პრეზიდენტ მიხეილ სააკაშვილთან დაკავშირებით, მოსამართლის მხრიდან სამართლიანი გადაწყვეტილების მიღების იმედი არ აქვს.

„ნამდვილად არ მაქვს მოლოდინი, რომ მიხეილ სააკაშვილს გაუშვებენ. ვესწრებოდი 4 მაღალი კვალიფიკაციის ექსპერტის შეფასებებს, დაკითხვას. დემენცია დაადასტურა ერთმა ექიმმა, ტოქსიკოლოგმა ისაუბრა, რომ მძიმე მეტალებით არის მოწამლული სააკაშვილი, ტრავმატოლოგმა თქვა, რომ სააკაშვილს ისეთი ტრავმები აქვს, თუ არ გადაიყვანთ, ადამიანის პარალიზებას გამოიწვევსო. ყველა საფუძველი აქვს მოსამართლეს, რომ გადაიყვანონ. არ მაქვს მოლოდინი, რომ სამართლიანი გადაწყვეტილება იქნება. გადაწყვეტილება იქნება პოლიტიკური და თუ არ მიეცემა სააკაშვილს სამკურნალოდ საზღვარგარეთ გადაყვანის შესაძლებლობა, ავტომატურად ეს იქნება გადაწყვეტილება სიკვდილის განაჩენის შესახებ. მე პირდაპირ ვიტყვი, რომ საზოგადოების განწყობიდან გამომდინარე, სააკაშვილის ციხეში დატოვება და სიკვდილის პირას მიყვანა ნამდვილად სამოქალაქო დაპირისპირებამდე მიიყვანს ქვეყანას“, - განაცხადა მანჯგალაძემ.