საქართველოს ტექნიკური უნივერსიტეტის ბიზნესტექნოლოგიების ფაკულტეტის სტუდენტი, ძიუდოისტი ლუკა მაისურაძე პარიზში მიმდინარე ძიუდოს გრანდ სლემზე ბრინჯაოს მედლის პრიზიორი გახდა. ამის შესახებ ინფორმაციას საქართველოს ტექნიკური უნივერსიტეტი ავრცელებს.

საქართველოს ტექნიკური უნივერსიტეტის რექტორი, პროფესორი დავით გურგენიძე ლუკა მაისურაძეს, უნივერსიტეტის ადმინისტრაციის, ბიზნეტექნოლოგიების ფაკულტეტის დეკანის, პროფესორ რუსუდან ქუთათელაძის, პროფესორ-მასწავლებლებისა და სტუდენტების სახელით, ძიუდოს გრანდ სლემზე გამარჯვებას ულოცავს.

„საქართველოს ტექნიკური უნივერსიტეტის სახელით, ვულოცავთ ლუკა მაისურაძეს კიდევ ერთ გამარჯვებას და საერთაშორისო აღიარებას, ვუსურვებთ შეუპოვრობას, ჯანმრთელობასა და არაერთ ღირსეულ გამარჯვებას პროფესიონალურ სპორტსა და წარმატებებს მის სამომავლო პროფესიულ საქმიანობაში. გვჯერა, რომ ჩვენი სტუდენტი სპორტულ კარიერას კიდევ მრავალი ჯილდოთი გაამდიდრებს,“ - აღნიშნავს დავით გურგენიძე.

მათივე ცნობით, პარიზის ძიუდოს გრანდ სლემზე, 90 კგ წონით კატეგორიაში მოასპარეზე ლუკა მაისურაძემ ბრძოლაში ჩეხი მეტოქე დავიდ კლარმეტი დაამარცხა.