ატომური ენერგეტიკის საერთაშორისო სააგენტოს ინფორმაციით, დამანგრეველ მიწისძვრებს თურქეთის ბირთვულ უსაფრთხოებაზე ამ დროისთვის არ უმოქმედია. ამის შესახებ სააგენტო ადგილობრივი მარეგულირებლის მოხსენებაზე დაყრდნობით იუწყება.

„ამ დროისთვის მიწისძვრებს გავლენა არ მოუხდენია თურქეთში ბირთვულ უსაფრთხოებაზე; ამ ეტაპზე არ არსებობს პრობლემები რადიოლოგიურ უსაფრთხოებასთან, რადიოაქტიური წყაროების უსაფრთხოებასთან და ატომურ ელექტროსადგურთან დაკავშირებით. ქვეყნის ატომური ელექტროსადგური არ დაზიანებულა“ , - ნათქვამია ატომური ენერგეტიკის საერთაშორისო სააგენტოს განცხადებაში.

ცნობისთვის, ორშაბათს დილით 7,7 მაგნიტუდის სიმძლავრის მიწისძვრა სამხრეთ-აღმოსავლეთ თურქეთში დაფიქსირდა. ბოლო მონაცემებით, დაიღუპა 1498 ადამიანი, დაშავდა 8,5 ათასზე მეტი. დაახლოებით 13:25 წუთზე კიდევ ერთი მიწისძვრა მოხდა, რომლის მაგნიტუდამ 7.6 შეადგინა.