„ნაციონალური მოძრაობის“ ყოფილი თავმჯდომარის ნიკა მელიას განცხადებით, მიხეილ სააკაშვილის გარშემო კონსოლიდაცია

დღეს მარტივი აღარ არის, რადგან „ნაციონალურმა მოძრაობამ“ თავი შეირცხვინა.

ნიკა მელიას თქმით, მისი ვალია, იბრძოლოს მიხეილ სააკაშვილის სიცოცხლის გადასარჩენად,

„ჩვენი მეცადინეობით მიხეილ სააკაშვილის გარშემო კონსოლიდაცია, მოდი პირდაპირ ვთქვათ, ადვილი აღარ არის. მე დარწმუნებული ვარ, დღეს აქ ძალიან ბევრი ოპოზიციური პოლიტიკური პარტიის ლიდერი იქნებოდა ჩვენ რომ არ შეგვერცხვინა საკუთარი თავი 9 ნოემბრიდან მოყოლებული. მე პირობას ვაძლევ პარტია „ნაციონალური მოძრაობის“ ამომრჩეველს, მხარდამჭერებს, ვისი მხარდამჭერიც არ უნდა ყოფილიყო ამ ბოლო თვეების განმავლობაში, რომ ჩემი მოქალაქეობრივი ვალია პირველ რიგში, რომ ვიბრძოლო მიხეილ სააკაშვილის სიცოცხლის გადასარჩენად, ისევე როგორც სხვების მოვალეობაა და ამას არანაირი ბიუროკრატიული თანამდებობა და პარტიული თანამდებობა არ სჭირდება. აქ ახლა ნიკა მელია, ლევან ხაბეიშვილი და ნებისმიერი სხვა ადამიანი არის მესამე ხარისხოვანი“, - განაცხადა ნიკა მელიამ.

მისი თქმით, უკანასკნელი თვეების განმავლობაში პარტიამ არათუ მოიზიდა, არამედ განიზიდა გარე მხარდაჭერა.

„ახლა, რა თქმა უნდა, ჩვენ გავცვლით მოსაზრებებს... მე პირადად ვეცდები, ყველა ჩატეხილი ხიდი, „ნაციონალურ მოძრაობასა“ და სხვა ოპოზიციურ პარტიებს, საზოგადოებრივ ჯგუფებს შორის აღდგეს. აქ საზოგადოებრივად აქტიური მოქალაქეების ჩართულობა იყო ძალიან მნიშვნელოვანი და მე ვფიქრობ, რომ ეს მოხერხდება, მაგრამ ვიწყებთ ამ ბრძოლას სამწუხაროდ მინუსიდან, რადგან ხალხის ნაწილს ბრძოლის ხალისი დავუკარგეთ.

უკანასკნელი თვეების განმავლობაში ჩვენ არათუ მოვიზიდეთ, არამედ განვიზიდეთ პარტიის გარე მხარდაჭერა ეს არის ძალიან სამწუხარო, მაგრამ მე ვფიქრობ, რომ ყველაფერი აღდგება“, - განაცხადა ნიკა მელიამ.