„ლელო“ აგრძელებს საპარლამენტო საქმიანობას. აგრძელებს საკრებულოში მუშაობას. ჩვენ ვართ მოწადინებული ივანიშვილი შეიცვალოს და ვერასდროს ვერ დავუჭერთ მხარს ვერცერთ ისეთ პროცესს, რომელიც არათუ ივანიშვილს არ ცვლის, არამედ შეიძლება აძლიერებდეს კიდეც ივანიშვილს, - ამის შესახებ პარტია „ლელოს“ პოლიტსაბჭოს წევრმა გრიგოლ გეგელიამ „პალიტრანიუსის“ გადაცემა „ნიუსრუმში“ წამყვანის კითხვის პასუხად განაცხადა, თუ როგორია „ლელოს“ პოზიცია საპარლამენტო მუშაობის შეწყვეტასთან დაკავშირებით.

ოპოზიციონერი პოლიტიკოსის თქმით, ამ პროცესში „ლელო“ არ აპირებს „ნაციონალურ მოძრაობასთან“ თანამშრომლობას.

გეგელიას განცხადებითვე, ის მოელოდა პატიმრობაში მყოფ საქართველოს ყოფილ პრეზიდენტთან, მიხეილ სააკაშვილთან დაკავშირებით გუშინდელ სასამართლო გადაწყვეტილებას.

„რა თქმა უნდა, მოველოდი არევაძის იმ გადაწყვეტილებას, რაც მან გუშინ მიიღო. მე მინდა ყველას შევახსენო, რომ ზუსტად ეს ადამიანია ის მოსამართლე, ვინც პირველად ხაზარაძეს და ჯაფარიძეს გამოუტანა ის განაჩენი, რომელიც გამოუტანა. ეს ადამიანი არის ჩვეულებრივი რიგითი მონა ბიძინისტური სისტემისა, რომელშიც ის არის ძალიან კომფორტულად გამწესებული, როგორც მონა, ამიტომაც არაფერი გასაკვირი ჩემთვის ამაში არაფერი არ ყოფილა“, - აღნიშნა გეგელიამ.

გარდა ამისა, პარტია „ლელოს“ პოლიტსაბჭოს წევრის თქმით, მას სურს დემოკრატია, ყველგან, ყველა შრეზე, მით უმეტეს ამ ქვეყნის დიდ პარტიებში.

„ჩვენ ვერ მივედით ნამდვილ დემოკრატიამდე, ნამდვილ დემოკრატიზაციამდე, თვისებრივად დემოკრატიულ პროცესამდე და ეს თუ ჩვენს თავში არ გავაკეთეთ, ჩვენს პარტიებში, ჩვენს ირგვლივ, ქვეყანაში როგორ გავაკეთებთ?!“ - განაცხადა გეგელიამ.

მისივე თქმით, „ქართული ოცნება“ არის ჩამოყალიბებულად ანტი-დემოკრატიული პოლიტიკური ერთეული, სადაც ორი წლის წინ პოლიტსაბჭო წყვეტდა ნიკა მელიას დაკავების საკითხს.

„კანონის აღსრულება, სამართლიანობისა და მართლმსაჯულების საკითხები ამ პარტიაში გაიხილება პოლიტსაბჭოში, რაც არ არის მისი პრეროგატივა და სახელმწიფო ინსტიტუტების ჩანაცვლებაა პარტიის პოლიტსაბჭოთი. ამიტომ ასეთ პირობებში ჩემთვის არევაძე ან ვინმე სხვა არაფრით არ არის გამონაკლისი“, - დასძინა გეგელიამ.