პარლამენტის საგაზაფხულო სესიის პლენარულ სხდომაზე დეპუტატებმა თურქეთში მიწისძვრისას დაღუპულებს წუთიერი დუმილით პატივი მიაგეს.

როგორც სესიის გახსნისას პარლამენტის თავმჯდომარემ შალვა პაპუაშვილმა აღნიშნა, საქართველო თურქეთს როგორც მორალურად, ისე ფიზიკურად უდგას მხარში.

„გუშინ ჩვენს რეგიონში, თურქეთში განსაკუთრებით უმძიმესმა მიწისძვრამ გამოიწვია უდიდესი ტრაგედია. დღეის მონაცემებით, სულ მცირე, 3 ათასი ადამიანია დაღუპული, 15 ათასზე მეტი არის დაშავებული. მინდა ვისარგებლო შემთხვევით და საქართველოს პარლამენტის სახელით მივუსამძიმრო თურქ ხალხს მომხდარი ტრაგედიის გამო. იცით, რომ საქართველოს ორი მოქალაქე დაიღუპა სტიქიის დროს. ამ დროისთვის, საქართველოს ყველა მოქალაქე, ვინც ითვლებოდა დაკარგულად, არის ნაპოვნი. ასევე, ქართველი სახანძრო - სამაშველო ჯგუფები გუშინ თურქეთში გაემგზავრნენ. ჩვენ ყოველთვის გვერდში ვუდგავართ ჩვენს მეგობრებს და ამ შემთხვევაში, თურქეთს სჭირდება როგორც ჩვენი მორალური მხარდაჭერა, ისე საქმით მხარდაჭერა. ჩვენი სახელმწიფო სრულად აკეთებს ამას. გთხოვთ წუთიერი დუმილით პატივი მივაგოთ ამ მიწისძვრით დაღუპულ პირებს“, - განაცხადა პაპუაშვილმა.