ვუერთდები აქციებს და ბოიკოტს, თუ იქნება მანდატების დატოვებაზე საუბარი, რა თქმა უნდა, ამასაც შევუერთდები, - ამის შესახებ „კანონის და სამართლის" ლიდერმა, დეპუტატმა თაკო ჩარკვიანმა განაცხადა.
როგორც მან აღნიშნა, აქციების საჭიროებაზე დიდი ხნის წინ საუბრობდა და მიესალმება, რომ ამ გადაწყვეტილებამდე მივიდნენ.
"ვუერთდები რა თქმა უნდა პროტესტს, ბოიკოტის ფორმაა, როგორც შევთანხმდით და კონსულტაციები ამაზე გვქონდა გუშინ. ვუერთდები, რადგან ძალიან მძიმე ვითარება შეიქმნა ქვეყანაში და რომ არ მოხდეს კიდევ უფრო მძიმე დაპირისპირება, ამიტომ ვუერთდები. უნდა დათმონ და ეს იქნება სახელმწიფოებრივი გადაწყვეტილება, შეიძლება არაპოპულარულად ჟღერდა, მაგრამ დიახ, სულ ვამბობდი, რომ აქცია პროტესტის უმნიშვნელოვანესი შემადგენელი ნაწილია, სხვა არ გამოუგონებია კაცობრიობას, მივიდნენ ამ დასკვნამდე, რომ ეს ასეა, ძალიან კარგია, მიხარია.
ხშირად ხდება, რომ ხელისუფალმა არაპოპულარული გადაწყვეტილება უნდა მიიღოს, თუკი ხედავს, რომ მის სახელმწიფოს სჭირდება სტატუსის მისაღებად, მეტი სიმშვიდის მოსაპოვებლად, ამაზე უნდა იფიქროს ხელისუფალმა და უნდა მიიღოს გადაწყვეტილება. მიხეილ სააკაშვილი უნდა გადაიყვანონ უცხოურ კლინიკაში, ეს იქნება სახელმწიფოებრივი გადაწყვეტილება. ვუერთდები აქციებსაც, მანდატების დატოვებაზე გადაწყვეტილება ჯერ არ არის მიღებული, ბოიკოტს ვუერთდები, თუ იქნება მანდატების დატოვებაზე საუბარი, რა თქმა უნდა, ამასაც შევუერთდები,"- განაცხადა ჩარკვიანმა.