ნონა წოწორია სახელმწიფოს წარმომადგენელი იყო სტრასბურგის სასამართლოში და რა თქმა უნდა, ჩვენი საერთო სირცხვილია ის, რომ ასეთი ადამიანი 9 წლის განმავლობაში სტრასბურგის სასამართლოში საქართველოს წარმოადგენდა, - ასე უპასუხა „ქართული ოცნების“ თავმჯდომარე ირაკლი კობახიძემ ჟურნალისტის კითხვას, რომელიც ნონა წოწორიას განცხადებას შეეხებოდა იმასთან დაკავშირებით, რომ „სააკაშვილი დამნაშავეა იმაში, რომ დაგვაჯერა- ბრბოსგან სახელმწიფოს მოწყობა შეიძლებოდა“.

კობახიძის თქმით, ნონა წოწორია, რომელიც ქართველ ხალხს ბრბოს უწოდებს, სტრასბურგის სასამართლოს მოსამართლედ „ნაცმოძრაობამ“ და ზურაბ ადეიშვილმა გაგზავნეს.

„რა ღირებულებები ჰქონდა ამ ხალხს, რა კრიტერიუმებით ხელმძღვანელობდნენ საკუთარი გადაწყვეტილების მიღების დროს, თავად შეგიძლიათ განსაჯოთ. სახელმწიფოს წარმომადგენელი იყო ის ამ სასამართლოში და რა თქმა უნდა, ჩვენი საერთო სირცხვილია , რომ ასეთი ადამიანი 9 წლის განმავლობაში სტრასბურგის სასამართლოში საქართველოს წარმოადგენდა.

მეორე სირცხვილია, ის, რომ ნონა წოწორია ახლა მოლდოვაში, მოსამართლეების შერჩევის პროცესში მონაწილეობს.

ეს მეორე პრობლემაა. როდესაც ნონა წოწორია, ზურაბ ადეიშვილის ყოფილი მოადგილე მოსამართლეებს არჩევს მოლდოვაში. ეს არის მოლდოვისთვის ძალიან სერიოზული პრობლემა. ეს პრობლემები ჩვენ 9 წლის განმავლობაში გამოვიარეთ. სამწუხაროდ, ეს პრობლემა დღეს მოლდოვას უდგას. ძალიან კარგად გვახსოვს ე.წ. შეფასების პროცესი,როგორ დასრულდა სასამართლოს წმენდით და შემდეგ სრული კონტროლის მოპოვებით სასამართლოზე სააკაშვილისა და ადეიშვილის მხრიდან და დღეს, წოწორია ასეთივე პროცესში არის ჩართული, რაც ძალიან სამწუხაროა, ძალიან მძიმეა ჩვენი მეგობარი მოლდოველი ხალხისთვის“, - განაცხადა კობახიძემ.