საქართველოს „შავ ხვრელად“ მოხსენიება რადიკალური ოპოზიციის მხრიდან პირდაპირ ანტისახელმწიფოებრივი პოლიტიკის გაგრძელებაა, - ამის შესახებ „ქართული ოცნების“ თავმჯდომარემ ირაკლი კობახიძემ ჟურნალისტებს განუცხადა.
მისი თქმით, რუსეთის მიმართ სანქციებზე მიერთებისკენ მოწოდება ახლა შერბილებულია.
„რაც შეეხება იმას, რომ სანქციებთან მიერთებისკენ მოგვიწოდებენ, შეარბილეს ეს რიტორიკა, მაგრამ ვიღაცები კიდევ არიან, ვინც მოგვიწოდებენ, რომ ჩვენ რუსეთს უნდა დავუწესოთ სანქციები. მინდა შეგახსენოთ მარტივი ჭეშმარიტება, ჩვენ, შარშან გვქონდა 10%-იანი ეკონომიკური ზრდა და რომ დაგვეწესებინა სანქციები, ამ შემთხვევაში, ეკონომიკის ზრდა იქნებოდა მინუს ათ პროცენტზე მეტი, ანუ ვარდნა გვექნებოდა, რეცესია 10%-ზე მეტი. ამ კუთხით მათ ჰქონდათ ორმაგი ინტერესი. ერთი, რომ რუსეთთან ესკალაციას უნდა მიეღწია მაქსიმუმისთვის და მეორე ფრონტი იყო ამის საბოლოო შედეგი. მეორე - ალტერნატიული მიზანი იყო შემდეგი: მინუს ათი პროცენტის შემთხვევაში, რა თქმა უნდა, ძალიან დამძიმდებოდა საქართველოში სოციალური ფონი“, - განაცხადა კობახიძემ.