მთავრობის ადმინისტრაციის შენობის წინ „ნაციონალური მოძრაობის“ მიერ ორგანიზებულ აქციაზე მოქალაქეები იკრიბებიან.
აქციის ორგანიზატორების განცხადებით, პროტესტი ყოველდღიური იქნება, ვიდრე ყოფილ პრეზიდენტს, მიხეილ სააკაშვილს სამკურნალოდ საზღვარგარეთ გადაყვანის შესაძლებლობა არ მიეცემა.
ამ წუთებში ადგილზე პოლიციის რამდენიმე ეკიპაჟია მობილიზებული, რომელთაც გზის სავალი ნაწილი გადაკეტილი აქვთ.
შეგახსენებთ, „ნაციონალურმა მოძრაობამ“ პროტესტის უწყვეტი ტალღა მას შემდეგ დააანონსა, რაც თბილისის საქალაქო სასამართლომ საქართველოს მესამე პრეზიდენტის, მიხეილ სააკაშვილისთვის სასჯელის გადავადებაზე ადვოკატების შუამდგომლობა არ დააკმაყოფილა.
მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლოს შუამდგომლობით ექსპრეზიდენტის ადვოკატებმა მიმართეს. აღნიშნულ შუამდგომლობას მოსამართლე გიორგი არევაძე დაახლოებით, ორი თვე განიხილავდა.
