„ერთიანი ნაციონალური მოძრაობა“ მორიგ აქციას დღეს, თბილისში იუსტიციის სამინისტროსთან გამართავს.
როგორც პარტიის თავმჯდომარე ლევან ხაბეიშვილმა მომდევნო დღეების სამოქმედო გეგმის წარდგენისას განაცხადა, აქცია 17:00 საათზე დაიწყება.
9 თებერვლიდან აქციები რეგიონებში გაიმართება.
„ეს აქციები იწყება ახლა და ყველამ იცოდეს, არ დასრულდება, ვიდრე პრეზიდენტი სააკაშვილი არ იქნება თავისუფალი და ჩვენი ქვეყნის ევროპული მომავალი არ იქნება უზრუნველყოფილი“, - განაცხადა ხაბეიშვილმა.
შეგახსენებთ, „ნაციონალურმა მოძრაობამ“ პროტესტის უწყვეტი ტალღა მას შემდეგ დააანონსა, რაც თბილისის საქალაქო სასამართლომ საქართველოს მესამე პრეზიდენტის, მიხეილ სააკაშვილისთვის სასჯელის გადავადებაზე შუამდგომლობა არ დააკმაყოფილა. მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლოს შუამდგომლობით ექსპრეზიდენტის ადვოკატებმა მიმართეს. აღნიშნულ შუამდგომლობას მოსამართლე გიორგი არევაძე დაახლოებით, ორი თვე განიხილავდა.