საქართველოში დღეს პრობლემა არის რადიკალიზაცია და არა პოლარიზაცია, თუმცა მადლობა ღმერთს და „ქართულ ოცნებას“, რომ დღეს რადიკალიზმის ხარისხი არის თვისებრივად შემცირებული, - ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

როგორც კობახიძე აღნიშნავს, უამრავი ევროპული ქვეყანაა, სადაც პოლიტიკური პარტიები ელემენტარულად ერთმანეთს არ ელაპარაკებიან და ასეთ პირობებში პოლარიზაციასთან დაკავშირებით ჩვენთვის „საყვედურის თქმა“, ქვეყნის წინააღმდეგ მიმართული ქმედებაა.

„თვითონ ტერმინი „პოლარიზაცია“ არ გამოხატავს სათანადოდ იმ მოცემულობას, რომელიც საქართველოშია. სინამდვილეში, საქართველოში პრობლემა არის არა პოლარიზაცია, არამედ რადიკალიზმი, რომლითაც ოპოზიციის ერთი ნაწილი პოლიტიკურ პროცესებში მონაწილეობს. ანუ, რადიკალიზაცია არის პრობლემა და არა პოლარიზაცია. თუმცა, დღეს რადიკალიზაციის რესურსიც არის მიზერული. ამასაც ხედავს, რა თქმა უნდა, ჩვენი საზოგადოება.

რაც შეეხება პოლარიზაციას - აბსოლუტურად ყველა ქვეყანაში არის პოლარიზაციის მაღალი ხარისხი. ვიცით, რომ ამერიკის შეერთებულ შტატებში არის პოლარიზაციის უპრეცედენტოდ მაღალი ხარისხი. არის უამრავი ევროპული ქვეყანა, სადაც პოლიტიკური პარტიები ელემენტარულად ერთმანეთს არ ელაპარაკებიან. ასეთ პირობებში, რა თქმა უნდა, ჩვენთვის რაღაც საყვედურის თქმა და ასე ქვეყნის ბრენდირება არის ქვეყნის წინააღმდეგ მიმართული ქმედება,“ - განაცხადა კობახიძემ.