იმედი გვაქვს, რომ მომდევნო თვეში შესაძლებელი იქნება სახალხო დამცველის არჩევა. აქ პოლიტიკური კონსულტაციები იქნება, არ გაამართლა [არასამთავრობო ორგანიზაციების ჩართულობამ], სერიოზული მინუსები დავინახეთ, - ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებთან განაცხადა.

მისივე თქმით, სახალხო დამცველის არჩევასთან დაკავშირებულ კონსულტაციებში არასამთავრობო ორგანიზაციები ჩართულები არ იქნებიან.

„ჩვენ კანდიდატის დასახელებას არ ვფიქრობთ, თუმცა ვფიქრობთ, რომ არსებობს რესურსი კონსენსუსის მისაღწევად. ამ საკითხის გარშემო თვის ბოლომდე დაიწყება კონსულტაციები. იმედი გვაქვს, რომ მომდევნო თვეში შესაძლებელი იქნება სახალხო დამცველის არჩევა. აქ იქნება პოლიტიკური კონსულტაციები, ამის საფუძველზე მივიღებთ გადაწყვეტილებას. არც წინა შემთხვევაში, არც ბოლო შემთხვევაში არ გაამართლა [არასამთავრობო ორგანიზაციების ჩართულობამ], სერიოზული მინუსები დავინახეთ, კლანური პრინციპით წარმოგვიდგინეს სამი კანდიდატი, შემდეგ ეს კლანი და მათთან დაკავშირებული ოპოზიცია ხმაშეწყობილად ითხოვდა ულტიმატუმის ფორმით მხოლოდ ამ სამი კანდიდატის დასახელებას, მიუხედავად იმისა, რომ ამ სამი კანდიდატიდან ზოგს ჰქონდა პრობლემა კეთილსინდისიერების და კომპეტენციის ნაწილში. ამ ყველაფერმა არ გაამართლა. რადგან, ეს პარლამენტია, პოლიტიკური პარტიების ერთობლივი ორგანოა, კონსულტაციები უნდა გამართონ პარტიებმა და შესაბამისი გადაწყვეტილება უნდა მიიღონ“, - აღნიშნავს კობახიძე.