ჩვენმა მოქალაქეებმა არ უნდა ინერვიულონ. ჩვენ არასოდეს დავუშვებთ, რომ ისინი თავშესაფრის გარეშე დარჩნენ, - ამის შესახებ თურქეთის პრეზიდენტმა რეჯეფ თაიფ ერდოღანმა სამხრეთ თურქეთში ვიზიტისას განაცხადა, რომელიც ქვეყანაში მომხდარი ძლიერი მიწისძვრის შედეგად ყველაზე მეტად დაზარალებული ადგილია.

ჟურნალისტებთან საუბრისას ერდოღანმა მიწისძვრაზე ხელისუფლების თავდაპირველ რეაქციასთან დაკავშირებით გარკვეული პრობლემები აღიარა.

„პირველ დღეს ჩვენ გვქონდა გარკვეული პრობლემები, მაგრამ შემდეგ, მეორე დღეს და დღესაც სიტუაცია კონტროლს ექვემდებარება“, - განაცხადა თურქეთის ლიდერმა.

მისივე თქმით, თურქეთის მთავრობა მიზნად ისახავს საცხოვრებლების აშენებას, იმ ადამიანებისთვის, რომლებიც 10 პროვინციაში, სტიქიის შედეგად უსახლკაროდ დარჩნენ.

„ჩვენ გარკვეული პრობლემები გვქონდა აეროპორტებსა და გზებზე, მაგრამ დღეს უკეთ ვართ. ხვალ და მოგვიანებით უკეთ ვიქნებით. ჯერ კიდევ გვაქვს საწვავის პრობლემები... თუმცა, ამასაც გადავლახავთ", - აღნიშნა ერდოღანმა.