საპარლამენტო პოლიტიკური ჯგუფი „ლელო - პარტნიორობა საქართველოსთვის“ დეპუტატი დავით უსუფაშვილი მიიჩნევს, რომ პარლამენტის თავმჯდომარის ანგარიშის შედგენისას პოლიტიკური ჯგუფების წარმომადგენლებთან კონსულტაცია უნდა გაიმართოს და მათი სათქმელიც გაახმოვანოს.

„მიმაჩნია, რომ ამ მოწვევის პარლამენტის საქმიანობა სულ ბოლოს რომ შეფასდება, ალბათ შეფასდება იმით, შევძელით თუ არა ჩვენ ქვეყნის წინსვლა ევროინტეგრაციის მიმართულებით. აქამდე ვიღაცამ დამოუკიდებლობა გამოაცხადა, ვიღაცამ ნატო-ს კარზე დააკაკუნა, ვიზალიბერალიზაციას მიაღწია და ასე შემდეგ, ანუ ეპოქალური მოვლენები მოხდა. ამიტომ ამ საკითხთან დაკავშირებით არა მარტო გასული წელი, არამედ მომავალი წელი იქნება ძალიან მნიშვნელოვანი.

შარშან კარგი გავაკეთეთ, რომ მივმართეთ ევროკავშირს კანდიდატის სტატუსთან დაკავშირებით, მაგრამ წარმოვიდგინოთ ამ მიმართვისას ჩვენ რომ ვყოფილიყავით შარლ მიშელის შეთანხმების შესრულების პროცესში და არა იმ ვითარებაში, რომ ყოფილმა მმართველმა პარტიამ ფეხი ითრია და არ შეუერთდა ამ დოკუმენტს, რამაც დღევანდელ მმართველ პარტიას ამ შეთანხმებიდან გამოსვლის საბაბი მისცა. ამიტომ აღმოვჩნდით იმ ვითარებაში, რომ შარლ მიშელის შეთანხმების შესრულების პროცესში კი არ ვიყავით, რომელიც ავტომატურად ყველაზე წინ დაგვაყენებდა და მივიღებდით ამ სტატუსს, არამედ უკან დაგვხია“, - განაცხადა დავით უსუფაშვილმა.

მისი თქმით, მნიშვნელოვანია 12 პუნქტთან დაკავშირებული მსჯელობა და კონსენსუსი, რომელიც ქვეყანას ერთობლივ გადაწყვეტილებამდე მიიყვანს.