„ლელო საქართველოსთვის" ლიდერები მამუკა ხაზარაძე, ბადრი ჯაფარიძე და გრიგოლ გეგელია საქართველოში თურქეთის საელჩოში იმყოფებოდნენ. მათ სოლიდარობა და მხარდაჭერა გამოხატეს თურქი ერის მიმართ და თურქეთის ელჩს საქართველოში პირადად მიუსამძიმრეს.

ელჩთან შეხვედრის შემდეგ "ლელოს" ლიდერმა მამუკა ხაზარაძემ განაცხადა, რომ საქართველოს დიდ ქალაქებში „ლელოს" ოფისები აქტიურად არიან ჩართულები ჰუმანიტარულ კამპანიაში თურქი ხალხის დასახმარებლად და ინტენსიურად მიმდინარეობს ჰუმანიტარული ტვირთების შეგროვება.

„ჩემი სოლიდარობა თურქ ხალხს და თურქეთის რესპუბლიკას. მიიღეთ ჩემი გულწრფელი სამძიმარი. ამ მძიმე წუთებში ჩვენი ქვეყანა და "ლელო" თქვენს გვერდით დგას. საელჩოსთან შეთანხმებით, პირადად მე და ბადრი ჯაფარიძე უმოკლეს ვადაში უზრუნველვყოფთ ჰუმანიტარული ტვირთის შეძენას და მიწოდებას, რათა დავეხმაროთ თურქ ხალხს", - განაცხადა მედიასთან „ლელოს" ლიდერმა მამუკა ხაზარაძემ.

„ლელოს" გენერალური მდივნის ბადრი ჯაფარიძის თქმით, ყველა მაქსიმალურად უნდა შევეცადოთ და დავეხმაროთ თურქ ერს ამ ურთულეს დროს.

„სამძიმარს ვუცხადებთ თურქ ხალხს იმ უზარმაზარი ტრაგედიისა და მსხვერპლის გამო, რაც თურქეთში, დამანგრეველ მიწისძვრას მოჰყვა. მაქსიმალურად უნდა შევეცადოთ, რომ ამ ძალიან მძიმე წუთებში ჩვენს მეგობარ ერს გვერდით დავუდგეთ და დავეხმაროთ ჰუმანიტარული ტვირთით".

ამ დროისთვის საქართველოს 5 ქალაქშია გახსნილი „ლელოს" ჰუმანიტარული დახმარების პუნქტები, სადაც თურქეთის საელჩოსთან კოორდინაციით ხდება ჰუმანიტარული ტვირთების მობილიზება და ლოჯისტიკა.