„ევროპელი დემოკრატების“ ლიდერებმა შეხვედრები ევროპული პოლიტიკის ცენტრში გამართეს
8 თებერვალს პარტია „ევროპელი დემოკრატების“ თავმჯდომარის პაატა დავითაიას, პოლიტიკური საბჭოს თავმჯდომარის ნიკოლოზ ვაშაკიძის და გენერალური მდივნის მამუკა გამყრელიძის შეხვედრა გაიმართა ევროპული პოლიტიკის ცენტრის წამყვან ანალიტიკოსთან ამანდა პოლისთან.
პარტიის თავმჯდომარის პაატა დავითაიას განცხადებით, ამანდა პოლისთან შეხვედრაზე ისაუბრეს ევროკომისიის 12 რეკომენდაციის შესრულებასთან დაკავშირებულ ხარვეზებზე.
„ევროპული პოლიტიკის ცენტრის წამყვან ანალიტიკოსთან შეხვედრაზე დეტალურად ვისაუბრეთ, თუ რა უნდა გააკეთოს საქართველომ იმისთვის, რომ მივიღოთ კანდიდატის სტატუსი. ბრიუსელში აქვთ დამოკიდებულება, რომ საქართველოს ხელისუფლება არ ასრულებს რეკომენდაციებს, მათ განსაკუთრებით აშფოთებთ მწვავე პოლარიზაცია, დემოკრატიული პროცესების და საარჩევნო, სასამართლო, ანტოკორუფციული რეფორმების შეფერხება, რაც მნიშვნელოვანი პუნქტებია ევროკომისიის რეკომენდაციებში.
ამანდა პოლის შეფასებით, პოლარიზაციის და პოლიტიკური კრიზისის განმუხტვისთვის აუცილებელია თანამშრომლობა და დიალოგი ხელისუფლებასა და ოპოზიციურ პარტიებს შორის.
შეხვედრაზე მკაფიოდ დავაფიქსირეთ ჩვენი პოზიცია, რომ პრობლემების მიუხედავად, საქართველომ აუცილებლად უნდა მიიღოს ევროკავშირის კანდიდატი ქვეყნის სტატუსი, რასაც იმსახურებს ქართველი ხალხი.
ამანდა პოლისთან შევთანხმდით მომავალში მჭიდრო და აქტიურ თანამშრომლობაზე. ასეთი შეხვედრები ხელს უწყობს პოლიტიკური პარტიების და ბრიუსელში მოქმედი გავლენიანი საერთაშორისო ორგანიზაციების დაახლოებას, რაც ძალიან მნიშვნელოვანი ნაბიჯია ჩვენი ქვეყნის ევროპული მომავლისთვის“, - განაცხადა პაატა დავითაიამ.
ინფორმაციას „ევროპელი დემოკრატების“ პრესსამსახური ავრცელებს.
