„საქართველოს ბანკის“ ყაჩაღობაში ბრალდებული ბადრი ესებუა ბრალს არ აღიარებს. როგორც სასჯელაღსრულების დაწესებულების დატოვების შემდეგ ესებუას ადვოკატმა იოსებ ჯანაშიამ ჟურნალისტებს განუცხადა, ესებუას სიცოცხლის მოსპობის რეალური საფრთხე არსებობდა, რის გამოც იმალებოდა.
„ის თავს დამნაშავედ არ ცნობს, შესაბამისად, იმ პოზიციაზეა, რაზეც ჩვენ თავიდანვე ვიყავით. ის არანაირ ბრალს - „საქართველოს ბანკის“ დაყაჩაღებას არ აღიარებს",- განაცხადა ადვოკატმა.
მისივე თქმით, ბადრი ესებუამ მას უთხრა, რომ მისი სიცოცხლის მოსპობის საფრთხის გამო ის იმალებოდა.
"რაც მან მითხრა, ეს იყო, რომ მისი სიცოცხლის განადგურების საფრთხე არსებობდა, რეალური შიში ჰქონდა ამის და აქედან გამომდინარე იმალებოდა",- დასძინა ადვოკატმა.
ადვოკატის თქმით, თუ სად იმყოფებოდა ამ პერიოდის განმავლობაში, ამაზე არ უსაუბრია.
"მასთან პირველად შევედი, ახლა გავიცანი, შესაბამისად, დეტალებს არ ჩავღრმავებივარ, ზოგადად ვისაუბრეთ“, - განაცხადა ჯანაშიამ.
ცნობისთვის, 2-წლიანი ძებნის შემდეგ, „საქართველოს ბანკის“ ყაჩაღობაში ბრალდებული ბადრი ესებუა დღეს დააკავეს.