ეკონომიკისა და მდგრადი განვითარების მინისტრის პირველმა მოადგილემ, რომეო მიქაუტაძემ ინვესტორებთან შეხვედრაში მონაწილეობა მიიღო, რომლის დროსაც განახლებადი ენერგიების მხარდაჭერის სქემით გათვალისწინებული აუქციონების ჩატარების პროცედურები განიხილეს.

ინფორმაციას ეკონომიკისა და მდგრადი განვითარების სამინისტრო ავრცელებს.

უწყების ცნობით, შეხვედრის ორგანიზებაში მონაწილეობა აშშ-ის საერთაშორისო განვითარების სააგენტომ (USAID) მიიღო. შეხვედრას ენერგეტიკულ სექტორში მომუშავე კომპანიებისა და ბიზნეს ასოციაციების წარმომადგენლები დაესწრნენ.

„თავის გამოსვლაში, მინისტრის პირველმა მოადგილემ განსაკუთრებული მნიშვნელობა ქვეყნის ეკონომიკური ზრდის პროცესში ენერგეტიკის განვითარების მნიშვნელობას მიანიჭა. მისი განცხადებით, საქართველოსთვის, რომლის ეკონომიკაც სტაბილურად ვითარდება, მისი ენერგეტიკული შესაძლებლობების მდგრადი ზრდა უმნიშვნელოვანესია.

რომეო მიქაუტაძის განცხადებით, ქვეყანას აქვს განახლებადი ენერგიის რესურსების დიდი პოტენციალი, რომლის ათვისებაც მთავრობის ეკონომიკური პოლიტიკის პრიორიტეტია.

მან ასევე ყურადღება ხელისუფლების ამბიციურ გეგმებზე გაამახვილა, რომლებიც მიმართულია მსხვილი ენერგეტიკული პროექტების განვითარებისკენ. მათ შორისაა, როგორც ადგილობრივი ენერგორესურსების ათვისება, ისე შავი ზღვის ენერგოკაბელის მშენებლობა, რომელიც საქართველოს და მთლიანად სამხრეთ კავკასიის რეგიონს ევროკავშირთან დააკავშირებს.

რომეო მიქაუტაძის თქმით, ყოველივე ეს ქვეყნის ენერგეტიკული უსაფრთხოების ხარისხს გაზრდის. მინისტრის პირველმა მოადგილემ მადლობა გადაუხადა USAID-ს იმ მხარდაჭერისთვის, რომელსაც აღნიშნული ორგანიზაცია საქართველოს ენერგეტიკული შესაძლებლობების განვითარებისადმი იჩენს.

შეხვედრაზე ასევე სიტყვით USAID-ის საქართველოს მისიის დირექტორი ჯონ პენელი გამოვიდა. ოფიციალური მოხსენებების შემდეგ, ეკონომიკისა და მდგრადი განვითარების სამინისტროს წარმომადგენლებმა შეხვედრის მონაწილეებს განახლებადი წყაროებიდან ენერგიის წარმოებისა და გამოყენების მხარდაჭერის სქემისა და სიმძლავრის აუქციონის წესების შესახებ პრეზენტაცია წარუდგინეს. პრეზენტაციის შემდეგ, დისკუსია გაიმართა,“ - აღნიშნულია ინფორმაციაში.