მე მგონია, რომ საქართველოს ხელისუფლება არ არის პრორუსი, აქ არის რუსეთთან ინტერესთა თანხვედრა, - ამის შესახებ „ლელოს“ დეპუტატმა დავით უსუფაშვილმა განაცხადა.

უსუფაშვილი გამოეხმაურა გრიგორი კარასინის განცხადებას, რომ "დასავლეთი ცდილობს საქართველოს ხელები გადაუგრიხოს" და აღნიშნა, რომ დასავლეთთან მიმართებით საქართველოსა და რუსეთის ხელისუფლების წარმომადგენელთა განცხადებები ერთმანეთს ემთხვევა, ამის მიზეზი კი დასავლეთის მხრიდან წამოსული კრიტიკაა.

„გადაგრეხას რაც შეეხება, რუსეთი საქართველოს უპირებდა და უპირებს კისრის მოგრეხას, დასავლეთს გამოწვდილი აქვს დახმარების ხელი და ეს ასეა უკვე ათწლეულებია, ამას ვერანაირი კარასინის რიტორიკა ვერ შეცვლის. ეს ჩვენ გვიწერია კონსტიტუციაში, რომ სახელმწიფო ორგანოები ვალდებულნი არიან ყველაფერი გააკეთონ საქართველოს ევროინტეგრაციისთვის. აქ ჩვენ ის კითხვა უნდა გვქონდეს, რატომ არ აკეთებენ ყველაფერს ამისთვის და რატომ აღვივებენ იმ ტიპის განწყობებს, რომ თითქოს დასავლეთს უნდა საქართველო იაფად გადაახურდაოს თავის მიზნებისთვის დიდ ამბებში, რატომ ემთხვევა ეს "ხაზები" კარასინის და თავის ძმების და დების "ხაზებს" დასავლეთთან მიმართებით? ჩვენ ეს კითხვები გვაღელვებს, ზოგს ამაზე უკვე ჩამოყალიბებული პასუხი აქვს, რომ საქართველოს ხელისუფლება რუსულ ხაზს ადგას, მე მგონია, რომ საქართველოს ხელისუფლება არ არის პრორუსი, აქ არის ინტერესთა თანხვედრა. როგორც პუტინი შეაწუხა დასავლეთის კრიტიკამ, "ქართული ოცნება" ასევე შეაწუხა დასავლეთის კრიტიკამ და ინტერესთა თანხვედრაა, რადგან ავტორიტარულ რეჟიმებში, სადაც მესიანისტური განწყობებია, რომ ვიღაცამ უნდა იხსნას ქვეყანა, ისევე როგორც რუსი "პატრიოტი" გეტყვით დღეს, რომ პუტინი უდრის რუსეთს და პირიქით რუსეთი პუტინს, საქართველოშიც იგივე ჩამოყალიბდა ნელ- ნელა,"- განაცხადა უსუფაშვილმა.