არსებობს „მეორე ფრონტის“ გახსნის კონკრეტული ინტერესი იმისთვის, რომ რუსეთს დაუმძიმდეს პირველ ფრონტზე მდგომარეობა - გარკვეული რესურსი, რომ რუსეთს დავუმძიმოთ ვითარება არსებობს, მაგრამ ეს, საბოლოო ჯამში, საქართველოს განადგურების ხარჯზე მოხდება - ამის შესახებ ჟურნალისტებს „ქართული ოცნების“ თავმჯდომარემ ირაკლი კობახიძემ განუცხადა.

მისივე თქმით, ხელისუფლების ინტერესია ქვეყანა არავის გაანადგურებინოს.

„ჩვენ გვყავს 25 ათასი კარგად გაწვრთნილი სამხედრო, გვაქვს 100-მდე ტანკი და მოიერიშე ორი თვითმფრინავი. რა თქმა უნდა, გარკვეული რესურსი, რომ დავუმძიმოთ რუსეთს ვითარება, არსებობს, მაგრამ ეს, საბოლოო ჯამში, საქართველოს განადგურების ხარჯზე მოხდება. რა თქმა უნდა, ვიღაცას აქვს ინტერესი, რომ მეორე ფრონტი გაიხსნას, მაგრამ ჩვენ გვაქვს იმისი ინტერესი, რომ ქვეყანა არავის გავანადგურებინოთ, ბოლომდე გავყვებით ამ ინტერესს.

ამერიკის შეერთებული შტატები, იაპონია, სამხრეთ კორეა, ყველა, მაქსიმალურად ცდილობს დაიცვას საკუთარი ეროვნული ინტერესები და არ დააზარალოს საკუთარი მოსახლეობა. როცა ჩვენ ამას ვაკეთებთ საქართველოში, ამაზე „გვაწვება“ ოპოზიცია, მაგრამ რეალურად რომ გადახედოთ, რატომ არ შეწყვიტა ამერიკის შეერთებულმა შტატებმა ვაჭრობა კონკრეტულ სფეროებში? ძალიან მნიშვნელოვანი სფეროებია, სადაც რუსეთთან ვაჭრობა არ შეუწყვეტია. იგივე ეხება ევროკავშირის წევრ ქვეყნებს, სადაც გაიზარდა თანხების მოცულობა. თვითონვე ამბობენ დღეში მილიარდ ევროს ურიცხავდნენ რუსეთის ფედერაციას და ამით პირდაპირ აფინანსებდნენ ომს. რატომ? - იმიტომ, რომ საბოლოო ჯამში, მათთვის პრიორიტეტული აღმოჩნდა ხალხის ინტერესების დაცვა. ასეთ დროს ჩვენი დამუნათება არის აბსოლუტურად არასამართლიანი. ჩვენ ვიცავთ ჩვენი ქვეყნის ინტერესებს და ასე გავაგრძელებთ მოქმედებას, ბუნებრივია“, - განაცხადა კობახიძემ.