საქართველოს რეგიონული განვითარებისა და ინფრასტრუქტურის მინისტრი, ირაკლი ქარსელაძე, ევროპის საინვესტიციო ბანკის რეგიონული წარმომადგენლობის ხელმძღვანელს საქართველოში მაჩიე ჩურას, სესხების უფროს ოფიცერს ჟატინ სეეჟორს და კონსულტანტ ნატა პეიტრიშვილს შეხვდა.

საქართველოს რეგიონული განვითარებისა და ინფრასტრუქტურის სამინისტროს ცნობით, შეხვედრაზე მხარეებმა EIB-ის დაფინანსებით მიმდინარე პროექტების შესახებ ისაუბრეს და მომავალი თანამშრომლობის დეტალები განიხილეს.

მათივე ინფორმაციით, ევროპის საინვესტიციო ბანკი რეგიონული განვითარებისა და ინფრასტრუქტურის სამინისტროს ერთ-ერთი ყველაზე მსხვილი პარტნიორია. EIB საქართველოში არაერთ მნიშვნელოვან პროექტს აფინანსებს, როგორც საგზაო ინფრასტრუქტურის, ისე წყალმომარაგება-წყალარინების და მუნიციპალური ინფრასტრუქტურის განვითარების მიმართულებით.

როგორც მინისტრმა აღნიშნა, იმსჯელეს თანამშრომლობის განვითარების პერსპექტივებზეც.

,,დღევანდელ შეხვედრაზე განვიხილეთ ევროპის საინვესტიციო ბანკის მხარდაჭერით ქვეყანაში მიმდინარე მნიშვნელოვანი პროექტების პროგრესი, რომელიც დადებითად შეფასდა. ვიმსჯელეთ თანამშრომლობის განვითარების პერსპექტივებზეც. საუბარი, ასევე, შეეხო სხვა სექტორებში EIB-ის ჩართულობას და თანამშრომლობის გაღრმავებას“,- განაცხადა ირაკლი ქარსელაძემ.