„ხალხის ძალისა“ და ასევე, პარტია “საქართველოსთვის“ დეპუტატებს პარლამენტში ე.წ. პოლიტიკური ჯგუფების შექმნის შესაძლებლობა მიეცემათ.

რეგლამენტში შესაბამისი ცვლილებების პროექტი მზად არის, რომელიც პარლამენტის ბიუროს უახლოეს სხდომაზე წარედგინება. კანონის პროექტი „ხალხის ძალის“ წარმომადგენლებმა მოამზადეს.

2024 წლის მოწვევის პარლამენტში, პარლამენტის არანაკლებ ორ წევრს პოლიტიკური ჯგუფის შექმნა შეუძლია. პოლიტიკური ჯგუფი იმავე უფლებებით სარგებლობს, რაც საპარლამენტო ფრაქციას აქვს.

ამასთან, „ქართული ოცნებიდან“ გასული დეპუტატები პოლიტიკურ ჯგუფებს ვერ ქმნიან. მიზეზი რეგლამენტის ჩანაწერია, რომლის მიხედვით, ერთი პარტიის სიით არჩეულ პარლამენტის წევრებს უფლება არა აქვთ პოლიტიკური ჯგუფი შექმნან, თუკი იმავე პარტიის წარდგენით არჩეულ დეპუტატებს ფრაქცია აქვთ შექმნილი. იმის გათვალისწინებით, რომ პარლამენტში ფრაქცია „ქართული ოცნება“ არსებობს, მისი შემადგენლობიდან გასული დეპუტატები პოლიტიკურ ჯგუფს ვერ ქმნიან და დღემდე უფრაქციო პარლამენტის წევრის სტატუსი აქვთ.

რეგლამენტში დაგეგმილი ცვლილებებით სწორედ ეს იცვლება. კანონის პროექტის მიხედვით, თუკი ერთი პოლიტიკური პარტიის წარდგენით არჩეული დეპუტატები ფრაქციას და პარტიას დატოვებენ, პოლიტიკური ჯგუფის შექმნა შეეძლებათ. ამ კონფიგურაციით პოლიტიკური ჯგუფს შექმნიან როგორც „ხალხის ძალის“, ასევე პარტია „საქართველოსთვის“ წარმომადგენლები.