პრემიერ-მინისტრს ვალდებულება აქვს იმოქმედოს თუ კითხვის ნიშნებს ხედავს და ყველაფერი უნდა მოვიკვლიოთ, სად არის არაჯანსაღი კონკურენციის წილი და სად არის წმინდა ინფლაციის , - ამის შესახებ ანალიტიკურ ცენტრ „ჯეოქეისის“ ეკონომიკური მიმართულების დირექტორმა, გიორგი აბაშიშვილმა „პალიტრანიუსის“ გადაცემაში „რეზიუმე“ განუცხადა, რითაც შეაფასა პრემიერ-მინისტრის ინიციატივა, რომლის მიხედვითაც მან ფინანსთა, ეკონომიკისა და სოფლის მეურნეობის მინისტრებს სურსათის იმპორტიორების დაბარება და ფასების შესწავლა დაავალა.

მისი თქმით, თუ აღნიშნულ საკითხში, არასწორი კონკურენცია აღმოჩნდა, მაშინ კანონში არსებული ბერკეტები უნდა ამოქმედდეს.

„საქართველოს აქვს მანდატი არაჯანსაღ კონკურენციაზე, თუმცა არაჯანსაღი კონკურენცია, შესაძლოა, იწვევდეს გაზრდილ ფასებს. ამ შემთხვევაში სახელმწიფომ, როდესაც შექმნა კონკურენციის სააგენტო, ამის ფუნქციონირების მთავარი ჭეშმარიტებაა კონკურენციის კონტროლი. სახელმწიფოს პოზიტიური ვალდებულებაა მოიკითხოს რა ხდება ამ სფეროში.

ამიტომ პრემიერის ამ განცხადებაში ვინმემ დაინახოს, რომ ვაიმე სახელმწიფო იწყებს ფასების კონტროლს - ვისაც საქართველოს ეკონომიკაზე წარმოდგენა აქვს, რამდენად ღია ეკონომიკაა, შეუძლებელია ამ ქვეყანაში ფასების კონტროლი, ფიზიკურად ვერ გააკონტროლებ, გამორიცხულია, რადგან ძალიან ღია ეკონომიკაა.

სწორედ ამიტომ, ლოგიკურია, რომ თუ კითხვის ნიშანი ჩნდება, პრემიერს დაქვემდებარებული უწყებაა კონკურენციის სააგენტო და დაავალოს, რომ მოხდეს ამა თუ იმ ბაზარზე მოკვლევა და მოხდეს საუბარი იმპორტიორებთან, ეს არის ჩვეულებრივი პროცესი.

ვიღაცამ მძაფრ პოლიტიკურ განცხადებად აღიქვა, მაგრამ პრემიერი პოლიტიკოსია და უნდა მძაფრ განცხადებას გააკეთებს და უნდა არამძაფრს. მას ვალდებულება აქვს იმოქმედოს თუ კითხვის ნიშნებს ხედავს და ფასებზე ყველაფერი უნდა მოვიკვლიოთ, სად არის არაჯანსაღი კონკურენციის წილი და სად არის წმინდა ინფლაციის წილი“, - განაცხადა აბაშიშვილმა.