გზავნილები, რომელიც აშშ-ის მხრიდან მივიღეთ, კიდევ ერთხელ ადასტურებს, რომ საქართველოსა და ამერიკას შორის თავდაცვისა და უსაფრთხოების სფეროში სტრატეგიული პარტნიორობა უმაღლეს ნიშნულზეა, - ამის შესახებ ამერიკის შეერთებულ შტატებში საქართველოს ელჩმა დავით ზალკალიანმა აშშ-ის თავდაცვის მდივანთან შეხვედრის შემდეგ განაცხადა.

ზალკალიანის თქმით, აშშ-ში თავდაცვის მინისტრის, ჯუანშერ ბურჭულაძის ვიზიტი „მნიშვნელოვანი და დროულია“.

„ამერიკის შეერთებულ შტატებში თავდაცვის მინისტრის ვიზიტი უაღრესად მნიშვნელოვანი და დროულია. აშშ-ში გვქონდა საინტერესო და შინაარსობრივი შეხვედრა პენტაგონში, ამერიკის შეერთებული შტატების თავდაცვის მდივანთან. ის გზავნილები, რომელიც აშშ-ის მხრიდან მივიღეთ, კიდევ ერთხელ ადასტურებს, რომ საქართველოსა და ამერიკას შორის თავდაცვისა და უსაფრთხოების სფეროში სტრატეგიული პარტნიორობა უმაღლეს ნიშნულზეა. ჩვენმა ამერიკელმა პარტნიორებმა განსაკუთრებული მადლიერება გამოხატეს იმ კონტრიბუციისთვის, რომელიც საქართველომ და ჩვენმა შეიარაღებულმა ძალებმა გლობალური უსაფრთხოების გამოწვევის წინააღმდეგ ბრძოლაში შეიტანეს. დღევანდელი უსაფრთხოების გარემო და ის თანამშრომლობა, რომელიც ამერიკის შეერთებულ შტატებთან გვაქვს, დარწმუნებული ვარ, ამ შეხვედრის შემდეგ კიდევ უფრო მეტი დინამიზმით იქნება გამორჩეული“, - განაცხადა დავით ზალკალიანმა.

ცნობისთვის, საქართველოს თავდაცვის მინისტრი აშშ-ის თავდაცვის მდივანს შეხვდა. ჯუანშერ ბურჭულაძემ აშშ-ის თავდაცვის მდივანთან, ლოიდ ოსტინთან შეხვედრისას საქართველოსა და აშშ-ს შორის თავდაცვისა და უსაფრთხოების სფეროში სტრატეგიული თანამშრომლობის საკითხები განიხილა. თავდაცვის სამინისტროს მიერ გავრცელებული ინფორმაციით, მინისტრმა შეხვედრაზე აღნიშნა, რომ საქართველო და ქართველი ხალხი დიდ მნიშვნელობას ანიჭებს აშშ-თან სტრატეგიულ პარტნიორობას, რაც მისივე შეფასებით, უმნიშვნელოვანესია საქართველოს თავდაცვისა და შეკავების შესაძლებლობების გაძლიერებისთვის, ქვეყნის მშვიდობიანი და სტაბილური განვითარებისთვის.