ვაკეში მომხდარი დანაშაულისთვის ბრალდებული ძმების, გუგა და დავით კაკულიების საქმეზე თბილისის საქალაქო სასამართლოში დასკვნითი სხდომა მიმდინარეობს
დაკავებული ძმების, გუგა და დავით კაკულიების საქმე დასკვნით ეტაპზეა და დღეს, შესაძლოა, განაჩენი გამოცხადდეს. პროცესი თბილისის საქალაქო სასამართლოში ამ წუთებში მიმდინარეობს.
დღევანდელ სხდომაზე დაცვის მხარე დასკვნით სიტყვას წარმოთქვამს. დიდი ალბათობით, ბრალდებულები საბოლოო სიტყვით არ ისარგებლებენ.
მოსამართლე განაჩენის გამოსატანად სათათბიროდ დღესვე გავა.
ცნობისთვის, ძმებ კაკულიებს არაყიშვილის ქუჩაზე სერგი ქურთიაშვილის ჯგუფურად მკვლელობის მცდელობას, ცეცხლსასროლი იარაღის და საბრძოლო მასალის ჯგუფურად, მართლსაწინააღმდეგო შეძენას, შენახვას, ტარებას, ასევე, საზღვრის უკანონო კვეთას ედავებიან. აღნიშნული დანაშაული სასჯელის სახედ და ზომად 13-დან 17 წლამდე თავისუფლების აღკვეთას ითვალისწინებს. გამოძიება ასევე ინტენსიურ რეჟიმში გრძელდება ძმებ კაკულიების მიერ სხვა დანაშაულებრივ ფაქტებთან, მათ შორის, ნიკა კვარაცხელიას მკვლელობის საქმესთან შესაძლო შემხებლობასთან დაკავშირებით. საგამოძიებო უწყების ცნობით, ბრალდებულებმა დანაშაული სომხეთშიც ჩაიდინეს, სწორედ აღნიშნულთან დაკავშირებით, საქართველოს სამართალდამცავი ორგანოები სომხეთის შესაბამის კომპეტენტურ ორგანოებთან აქტიურად თანამშრომლობენ.
