გიორგი ვაშაძე - თავდაცვის მინისტრი აშშ-ში მალულად ჩავიდა - 33 მილიონი მიხარია, მაგრამ 300 მილიონიც შეეძლო მიეღო საქართველოს, ჰაერსაწინააღმდეგო სისტემების მოწოდების საკითხი ვინმემ დააყენა?!

აშშ-ში თავდაცვის მინისტრი მალულად ჩავიდა, რომ არ ყოფილიყო დისკუსია, თუ რა საკითხები დაეყენებინა - 33 მილიონი მიხარია, მაგრამ 300 მილიონიც შეეძლო მიეღო საქართველოს. სადმე ჰაერსაწინააღმდეგო სისტემების მოწოდების საკითხი ვინმემ დააყენა?! - ამის შესახებ ჟურნალისტებთან „სტრატეგია აღმაშენებლის“ ლიდერმა გიორგი ვაშაძემ განაცხადა, რითაც პენტაგონში აშშ-სა და საქართველოს თავდაცვის მინისტრების შეხვედრას გამოეხმაურა.

ვაშაძე მიიჩნევს, რომ ვიზიტი არა რეალური შედეგების მიღებას, არამედ იმას ემსახურებოდა, რომ ევროინტეგრაციის მომხრე მოქალაქეებს, რომლებიც მთლიანი მოსახლეობის 80 პროცენტს შეადგენს, აჩვენონ, თითქოს რამეს აკეთებენ.

„მივესალმები ამერიკის თავდაცვის მინისტრის განცხადებას, რაც ადასტურებს ჩვენს მიერ არაერთხელ ნათქვამს, რომ ამერიკელები მზად არიან ყველაფერი გააკეთონ საქართველოს თავდაცვისუნარიანობის გაზრდისთვის, მათ შორის თანამედროვე შეიარაღების მოწოდებით. ამას არ აკეთებს „ქართული ოცნება“. უფრო მეტიც, მალულად, ჩუმად ჩადიან აშშ-ში, ამის თაობაზე საქართველოში არავინ ვიცოდით, დამალეს, რომ არ ყოფილიყო დისკუსია იმაზე, თუ რა საკითხები უნდა დაეყენებინა ქართულ მხარეს შეხვედრაზე. ამერიკის მხრიდან მზაობა არის სრულფასოვანი, რომ მხარდაჭერა აღმოუჩინოს საქართველოს, მაგრამ თუ ჩვენ არ ვიქნებით ინიციატორი, ეს იქნება შეხვედრა შეხვედრისთვის. თუ არ დააყენე საკითხი, რომ თანამედროვე შეიარაღება, რაც უკრაინაში შედის, გჭირდება შენც, მაშინ ამას არავინ მოგცემს, არც ერთ განცხადებაში არ გვინახავს, რომ რაიმე საკითხი დააყენა დამატებით. სწორი პოზიცია რომ აერჩიათ, დღეს უკვე გვექნებოდა ჰაერსაწინააღმდეგო სისტემები და ის თანამედროვე შეიარაღება, რაც განამტკიცებდა საქართველოს თავდაცვისუნარიანობას და საფრთხე რუსეთის მხრიდან იქნებოდა მინიმუმამდე დაყვანილი. აშშ-ში თავდაცვის მინისტრი ჩადის იმისთვის, რომ საქართველოს მოქალაქეების 80 პროცენტს, რომელიც მხარს უჭერს ქვეყნის ევროინტეგრაციას, მოაჩვენოს, თითქოს რამეს აკეთებს ამ მიმართულებით, ამიტომ ჩადიან ვაშინგტონშიც, ბრიუსელშიც. 33 მილიონი მიხარია, მაგრამ 300 მილიონსაც მიიღებდა საქართველო თავდაცვისუნარიანობის ზრდისთვის საკითხი რომ დაეყენებინათ. მითხარით, სადმე დააყენა „ქართულმა ოცნებამ“ ჰაერსაწინააღმდეგო სისტემების მოწოდების საკითხი? გაგახსენებთ, ფრანგულ მხარეს უარი უთხრეს პირდაპირ ამის მოწოდებაზე,“ - განაცხადა ვაშაძემ.

ცნიბისათვის, პენტაგონში აშშ-სა და საქართველოს მინისტრების შეხვედრის თაობაზე ინფორმაცია პენტაგონის ვებ- გვერდზე გავრცელდა. აშშ-ს თავდაცვის მინისტრის, ლოიდ ოსტინის განცხადებით, საქართველოსთან დაკავშირებით რისკის მიხედვით შეფასებული გადახდის გრაფიკი დააამტკიცეს, რათა საქართველომ სასიცოცხლო მნიშვნელობის სამხედრო შესაძლებლობები უფრო მარტივად მოითხოვოს და შეიძინოს. ამასთან, ცნობილი გახდა, რომ აშშ 33 მილიონი დოლარით ზრდის საქართველოსთვის სამხედრო დახმარებას.

„საქართველომ გააღრმავა კავშირები დასავლეთთან და განამტკიცა საკუთარი გზა ევროატლანტიკური ინტეგრაციისკენ. ამ დროის განმავლობაში საქართველომ მნიშვნელოვანი წვლილი შეიტანა გლობალურ უსაფრთხოებაში. ქართული სამხედრო ნაწილები მსახურობდნენ და თავს სწირავდნენ აშშ-სა და ნატო-ს ძალებთან ერთად კოსოვოში, ერაყსა და ავღანეთში. საქართველო იყო ერთ სულ მოსახლეზე ყველაზე დიდი კონტრიბუტორი ავღანეთში ნატო-ს მისიაში“, - განაცხადა ლოიდ ოსტინმა.

რობინ ვაგენერი - „უცხოური გავლენის გამჭვირვალობის შესახებ“ კანონთან ერთად ევროკავშირში გაწევრიანება აღარ იქნება - ამის შანსი არ არის
ქართული პრესის მიმოხილვა 11.07.2024
ვახტანგ ძაბირაძე - თუ  ყველაფერი ასე გაგრძელდა, თან ამას დაემატა დასავლეთის მიერ არჩევნების შედეგების არ აღიარება, დასავლეთის საქართველოსთან პარტნიორობა დასრულდება და დასრულდება ყველა მიმართულებით
ფლორენს ბაუერი - დემოგრაფიულ ცვლილებასთან გამკლავების საუკეთესო გზა არის ისეთი პირობების შექმნა, რომელიც ადამიანებს საკუთარი მომავლისა და ოჯახის მიმართ მტკიცე რწმენას გაუჩენს
უპრეცედენტო პირობები Renault Captur-ის ახალი ავტომობილის შეძენისას
თიბისი სტარტაპერებისთვის ახალ კამპანიას იწყებს
ბაზისბანკი სვანეთის IV საერთაშორისო კინოფესტივალის ოფიციალური სპონსორია