როცა პარლამენტის წევრი, უმრავლესობის ლიდერი თავისი ქვეყნის მოქალაქეს შეურაცხმყოფელად ექცევა და აგინებს, ეს ნორმალური და ადეკვატური არ არის, - ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა განაცხადა, რითაც უპასუხა ჟურნალისტის კითხვას, როგორ შეაფასებდა „ქართული ოცნების“ აღმასრულებელი მდივნის, მამუკა მდინარაძის კომენტარს, რომლის მიხედვითაც, მდინარაძემ „ნაციონალური მოძრაობის“ წევრებს სიტყვიერი შეურაცხყოფა მიაყენა.

ლევან ხაბეიშვილის თქმით, „ქართული ოცნების“ წარმომადგენლები ქვეყნის ღალატზეც მიდიან, ამიტომ არ უკვირს, რომ იუზრდელებენ.

„ის, რომ „ქართული ოცნების“ წარმომადგენლები უზრდელები არიან, ის, რომ ისინი რუსები არიან, ამას საზოგადოება ყოველდღიურ რეჟიმში ხედავს. ადამიანები აპროტესტებენ მათ რუსობას იმიტომ, რომ ისინი ხელისუფლების სათავეში არიან და ქვეყნის პოლიტიკას განსაზღვრავენ. ისინი მოღალატეობრივ, ჩვენი ქვეყნისთვის სამარცხვინო პოლიტიკას ეწევიან. ეს ისტორიაში შავ ლაქად დარჩება.

როცა პარლამენტის წევრი, უმრავლესობის ლიდერი მისი ქვეყნის მოქალაქეს შეურაცხმყოფელად ექცევა და აგინებს, ეს ნორმალური და ადეკვატური არ არის. იმ პირობებში, რა პირობებშიც ჩვენ ცხოვრება გვიწევს, მათი მხრიდან არაფერი მიკვირს. ისინი ქვეყნის ღალატზეც მიდიან და ამიტომ არ მიკვირს, რომ იუზრდელებენ“, - განაცხადა ლევან ხაბეიშვილმა.

ცნობისთვის, 9 თებერვალს „ნაციონალური მოძრაობის აქტივისტები „ქართული ოცნების“ აღმასრულებელ მდივანს, მამუკა მდინარაძეს ტელეკომპანია “იმედთან“ დახვდნენ. აქტივისტები მდინარაძის მისამართით სკანდირებდნენ: „რუსი ხარ“ და მიმართავდნენ, რომ „მოღალატეობრივ“ განცხადებებს აკეთებს, რაზეც მდინარაძემ უპასუხა, რომ საკუთარ „სიტყვებზე პასუხს აგებს“.

ტერიტორიაზე მობილიზებული იყო პოლიცია.

„არ ვიცი, ასეთი სასაცილო ხალხი. ეგონათ, რომ არ გადავიდოდი მანქანიდან, გადავედი და კაცს რომ ეუბნები: აი, რა გინდა თქვი, რას ითხოვ და სასტვენს რომ ჩაიდებს პირში და მთელი ძალით ჩაბერავს პასუხად...დადიან ასე ჩაბერილები. მართლა ცოდოები არიან. ამ ხალხს ავალებენ, რომ მოვიდეს და რუსი გეძახოს“, - განაცხადა მდინარაძემ მოგვიანებით „იმედის“ ეთერში.