ევროპა-კავკასია-აზიის სატრანსპორტო დერეფნის „ტრასეკას" გენერალური მდივნის, ასეტ ასავბაევის განცხადებით, გეოპოლიტიკური სიტუაციიდან გამომდინარე, „ტრასეკას“ მარშრუტების როლი დღეს ძალიან აქტუალურია და პრიორიტეტებს გადახედვის შემდეგ, ეს დერეფანი გადამზიდებისთვის, ქვეყნებისთვისა და ტვირთმფლობელებისთვის სულ უფრო მეტ უპირატესობას იძენს.

ეკონომიკის სამინისტროს მიერ გავრცელებული ინფორმაციით, ასეტ ასავბაევი თბილისში ორგანიზაციის მთავრობათაშორისი კომისიის ყოველწლიურ, რიგით მე-16 სხდომის მუშაობაში მონაწილეობს.

როგორც ასეტ ასავბაევი აღნიშნავს, „ტრასეკას“ პლატფორმა მის წევრ ქვეყნებს ეხმარება, საზღვრების გადაკვეთის, შეზღუდვების თავიდან აცილების, გადაზიდვების გაუმჯობესებისთვის ერთიანი სატრანსპორტო გარემოს უზრუნველყოფის მიზნით, საკანონმდებლო საფუძველი შექმნან.

სხდომის დღის წესრიგის მთავარ საკითხებს შორისაა კასპიის ზღვაზე ახალი გემის მიღების კონცეფცია, გადაზიდვების საფასურის შემცირების მიზნით - კასპიის ზღვაზე ბორნის საშუალებით.

„მნიშვნელოვანია აღინიშნოს, რომ ისეთი ინიციატივები, როგორიცაა მულტიმოდალური გადაზიდვების განვითარების მხარდაჭერა, მიმართულია ჩვენი მარშრუტის კონკურენტუნარიანობის ამაღლებისკენ. ასევე საქართველოს თავმჯდომარეობის პერიოდში ვგეგმავთ, შევიმუშაოთ ტარიფების წარმოების ერთიანი მიდგომა საკონტეინერო გადაზიდვებისთვის, რათა ის მიმზიდველი იყოს ჩვენს მარშრუტებზე. დღესდღეობით ამ ტარიფებს თითოეული ქვეყანა თავისი ინტერესებიდან გამომდინარე განსაზღვრავს, ჩვენი მიზანია, რომ ამ საკითხთან დაკავშირებით ერთიანი მიდგომა არსებობდეს, შეგვეძლოს ამა თუ იმ სატარიფო შეღავათების გამოყენება, რათა საბოლოო ტარიფი კონკურენტუნარიანი და საინტერესო იყოს", - აღნიშნა „ტრასეკას" გენერალურმა მდივანმა.

2023 წლის 11 თებერვლიდან „ტრასეკას“ სამთავრობათაშორისო კომისიის თავმჯდომარე ქვეყანა 1 წლით საქართველო იქნება. სხდომის მონაწილე ქვეყნების დელეგაციები, სხვა საკითხებთან ერთად, 2021 წელს საერთაშორისო საგზაო ტრანსპორტის „ტრასეკას“ სანებართვო სისტემის დანერგვის შედეგებს განიხილავენ. ასევე, „ტრასეკას“ მთავრობათაშორისი კომისიის 2018-2021 წლების სამოქმედო გეგმის ანგარიშს, რომლის მიზანია 2016-2026 წლებში ევროპა-კავკასია-აზიის საერთაშორისო სატრანსპორტო დერეფნის განვითარებისათვის სტრატეგიის განხორციელება. ამასთან, მთავრობათაშორისი კომისიის სხდომაზე დაგეგმილია „ტრასეკას“ დერეფნის მულტიმოდალური ტრანსპორტის განვითარების დოკუმენტისა და სამთავრობათაშორისო კომისიის სხდომის შემაჯამებელი რეზოლუციის მიღება”, - ნათქვამია ინფორმაციაში.