ივანე ჯავახიშვილის სახელობის თბილისის სახელმწიფო უნივერსიტეტის რექტორმა ჯაბა სამუშიამ თურქეთში მომხდარი სტიქიის გამო საქართველოში თურქეთის რესპუბლიკის ელჩს, ალი ქაან ორბაის პირადად მიუსამძიმრა და საელჩოში გახსნილ სამძიმრის წიგნში ჩანაწერი დატოვა.
ამის შესახებ ინფორმაციას თსუ ავრცელებს.
როგორც ჯაბა სამუშიამ აღნიშნა, თურქეთში დამანგრეველი მიწისძვრის შედეგად დაზარალებული მოქალაქეებისთვის თბილისის სახელმწიფო უნივერსიტეტის სახელით უკვე გროვდება ჰუმანიტარული დახმარება, რომელსაც საელჩოში გაგზავნიან.
„ეს არის უდიდესი ადამიანური ტრაგედია არა მხოლოდ თურქეთისთვის, არამედ მთელი მსოფლიოსათვის, სტიქიური უბედურების შედეგად დაღუპულია ათასობით ადამიანი. თბილისის სახელმწიფო უნივერსიტეტის სახელით ვუსამძიმრებ თურქ ხალხს. ჩვენ უკვე დავიწყეთ აქცია, რომელიც ითვალისწინებს მათ მხარდაჭერას, გვინდა, შევაგროვოთ პირველადი ნივთები, რომელიც თურქეთში გაიგზავნება“, - განაცხადა ჯაბა სამუშიამ.