„გერმანიის მარშალის ფონდის“ უფროსი მკვლევარის, ჯონათან კაცის განცხადებით, ერთადერთი „ომის პარტია“ ახლანდელ კონფლიქტში პუტინი და რუსეთია, რომლებმაც უკრაინაში სისასტიკეები და ომის დანაშაულები ჩაიდინეს.

ჯონათან კაცი „ამერიკის ხმასთან“ საუბარში, „გლობალური ომის პარტიის“ საქართველოში ინტერესების შესახებ „ქართული ოცნების“ თავმჯდომარის, ირაკლი კობახიძის განცხადებას გამოეხმაურა.

„ერთადერთი „ომის პარტია“ ახლანდელ კონფლიქტში პუტინი და რუსეთი არიან, რომლებმაც სისასტიკეები და ომის დანაშაულები ჩაიდინეს უკრაინაში. ქართველებს ძალიან კარგად ესმით, რუსეთის აგრესია რას ნიშნავს კრემლის მიერ საქართველოს წინააღმდეგ მიმართული ძალადობის და მიმდინარე ოკუპაციის, საქართველოს ორი რეგიონის, აფხაზეთისა და ცხინვალის, ნაბიჯ-ნაბიჯ არალეგალური ანექსიის გათვალისწინებით“, - აცხადებს ჯონათან კაცი.