ძმები კაკულიების მიმართ თბილისის საქალაქო სასამართლოს მიერ გამოტანილ განაჩენს პროკურატურა სააპელაციო სასამართლოში გაასაჩივრებს.

როგორც საქმის პროკურორი, თამარ ყულჯანიშვილი განმარტავს, საქმეზე პროკურატურას არაერთი მტკიცებულება ჰქონდა წარმოდგენილი.

"ბრალდების მხარე თბილისის საქალაქო სასამართლოს გადაწყვეტილებას სააპელაციო სასამართლოში აუცილებლად გაასაჩივრებს. ფაქტია, რომ სასამართლომ გაიზიარა ბრალდების მხარის მტკიცებულებები. სასამართლომ დადასტურებულად მიიჩნია, რომ ნამდვილად ძმები კაკულიების მიერაა დანაშაული ჩადენილი. სასამართლომ დადასტურებულად მიიჩნია, რომ ძმები კაკულიები ნამდვილად იმყოფებოდნენ არაყიშვილი-ფალიაშვილის კვეთაზე და ნამდვილად, ცეცხლსასროლი იარაღის გამოყენებით დაესხნენ თავს სერგო ქურთიაშვილს და გაიზიარა, რომ ისინი ცეცხლსასროლ იარაღს ჯგუფურად ატარებდნენ, ასევე მოსამართლემ გაიზიარა, რომ ძმებმა კაკულიებმა სახელმწიფო საზღვარი უკანონოდ გადმოკვეთეს. ისინი დროებით საცხოვრებელ ბინაში უკანონოდ ინახავდნენ ცეცხლსასროლ იარაღს", - განაცხადა ყულჯანიშვილმა.

მოსამართლის განმარტებას, რომ გარკვეული ბრალდებების დამადასტურებელი მტკიცებულება წარმოდგენილი არ იყო, პროკურორი არ ეთანხმება და განმარტავს, რომ "მყარი მტკიცებულებები არსებობდა".

რაც შეეხება ზურაბ ჟვანიას კუთვნილ იარაღს, რომელიც კაკულიების დროებითი საცხოვრებელი სახლიდან ამოიღეს, პროკურორის თქმით, ამ მიმართულებით გამოძიება მიმდინარეობს.

"ზურაბ ჟვანიას სახელზე რეგისტრირებულ იარაღს რაც შეეხება, სასამართლომ დადასტურებულად მიიჩნია, რომ აღნიშნულ იარაღს ძმები კაკულიები დროებით საცხოვრებელ ბინაში ინახავდნენ. ამ იარაღთან მიმართებით გამოძიება შსს-ში ნამდვილად მიმდინარეობს. ბუსა ჟვანია ქვეყანაში არ იმყოფებოდა და ვერ გამოიკითხა, თუმცა, მისი გამოკითხვისთვის მიმართული გვაქვს",- განაცხადა ყულჯანიშვილმა.

ცნობისთვის, დაკავებული ძმები - გუგა და დავით კაკულიები თბილისის საქალაქო სასამართლომ დამნაშავედ ცნო და მათ 9-9 წლით თავისუფლების აღკვეთა მიესაჯათ.

მოსამართლის გადაწყვეტილებით, ძმებ კაკულიებს არაყიშვილის ქუჩაზე სერგი ქურთიაშვილის ჯგუფურად მკვლელობის მცდელობის ბრალდება სხეულის განზრახ მსუბუქი დაზიანებით გადაუკვალიფიცირდათ.

რაც შეეხება ცეცხლსასროლი იარაღის და საბრძოლო მასალის ჯგუფურად, მართლსაწინააღმდეგო შეძენას, შენახვას, ტარებას, მოსამართლემ ისინი მხოლოდ ჯგუფურ ტარებაში გაამტყუნა. კაკულიები დამნაშავედ იქნენ ცნობილი საზღვრის უკანონო კვეთაში.