„საქართველოს ბანკის“ ყაჩაღობაში ბრალდებული ბადრი ესებუას ადვოკატი თვლის, რომ დღევანდელ სასამართლო სხდომაზე ბრალდების მხარის მოთხოვნა იყო დაუსაბუთებელი.

„ვთვლი, რომ ბრალდების მხარის მოთხოვნა იყო დაუსაბუთებელი და ეწინააღმდეგებოდა საკონსტიტუციო სამართლის გადაწყვეტილებას და შესაბამისად მოსამართლემ მიიღო აბსოლუტურად სწორი გადაწყვეტილება“, - განაცხადა ადვოკატმა იოსებ ჯანაშიამ.

ამასთან, ადვოკატისთვის გაურკვეველია, თუ რატომ არ ჩამოიყვანეს პატიმარი ბათუმიდან სასამართლო სხდომაზე. მისი თქმით, მოთხოვნა ამის თაობაზე გაგზავნილი იყო.

„გამიკვირდა, რომ ბადრი ესებუა არ მოიყვანეს სასამართლო სხდომაზე. რა ტექნიკური მიზეზი უნდა ყოფილიყო, მოთხოვნა თავის დროზე იყო გაგზავნილი. თუმცა მოთხოვნა სხვა პროცესებზე იქნება, რომ პატიმარი დაესწროს სასამართლო პროცესს“, - აღნიშნა იოსებ ჯანაშიამ.

ცნობისთვის, ზუგდიდის რაიონულმა სასამართლომ ბადრი ესებუას ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების საქმეზე პატიმრობა აღარ შეეფარდა, რადგან ბანკის ყაჩაღობის საქმეზე უკვე შეფარდებული აქვს.