რეჯეფ თაიფ ერდოღანის თქმით, თურქეთმა საკმარისად სწრაფად ვერ შეძლო მიწისძვრის შედეგების ლიკვიდაციისთვის სამუშაოების წარმოება
თურქეთის პრეზიდენტის რეჯეფ თაიფ ერდოღანის თქმით, თურქეთმა საკმარისად სწრაფად ვერ შეძლო მოწისძვრის შედეგების ლიკვიდაციისთვის სამუშაოების წარმოება.
„იმდენი შენობა დაინგრა ისეთ დიდ ტერიტორიაზე, რომ ჩვენ მაინც ვერ შევძელით სამუშაოს დაჩქარება ისე, რომ საჭირო ტემპში მიმდინარეობდეს, მიუხედავად იმისა, რომ მსოფლიოში ყველაზე დიდი, 140 ათასი ადამიანის რაოდენობის საძიებო-სამაშველო ძალები შევაგროვეთ”, - განაცხადა ერდოღანმა ქალაქ ადიამანში გამოსვლისას.
მან აღნიშნა, რომ მიწისძვრის შედეგების ლიკვიდაცია ძალიან რთულია, მათ შორის ამინდის გამო.
„ის ფაქტი, რომ რეგიონში ახლა ისეთი ზამთარია, რომელიც დიდი ხანია არ გვქონია, კიდევ ერთი დაბრკოლება გახდა ჩვენთვის”, - აღნიშნა თურქეთის პრეზიდენტმა.
ერდოღანის თქმით, რეკონსტრუქციის წლიური გეგმის ფარგლებში მთავრობა მიწისძვრისგან დაზარალებულ რეგიონებს აღადგენს და დაზარალებულებს ქირის გადასახდელად წლიურ დახმარებას გაუწევს.
