ხელისუფლებას 12 პუნქტიანი გეგმის შესრულების საკითხთან დაკავშირებით ფრთხილი დამოკიდებულება აქვს. არის მნიშვნელოვანი მიმართულებითაც წინსვლა, მაგრამ რამდენიმე საკვანძო საკითხია, რომელზეც „ქართული ოცნების“ ხელისუფლება ამბობს, რომ არც კი აპირებს შესრულებას, - ამის შესახებ ორგანიზაცია „დემოკრატიის ინდექსი-საქართველოს“ ხელმძღვანელმა, ეკა ციმაკურიძემ „პალიტრანიუსის“ გადაცემა „რეზიუმეში“ განაცხადა.

მისი შეფასებით, 12 პუნქტიანი გეგმის შესრულებასთან დაკავშირებით, საკვანძო მიმართულებებია შესასრულებელი.

„ეს ისეთი საკვანძო საკითხებია, რომლის გარეშე კანდიდატის სტატუსის მიღებაში წარმატებას ვერ მივაღწევთ. პირველ რიგში, ეს არის სასამართლო რეფორმა. სასამართლოს მიმართულებით ხელისუფლებამ თავდაპირველადვე არ აღიარა რა იყო გასაკეთებელი. ხელისუფლებას უნდოდა სასამართლო რეფორმის სტრატეგია და მოქმედების გეგმა დაემტკიცებინა, რომელიც ჩართულობითი პროცესი უნდა ყოფილიყო. შედეგად მივიღეთ, რომ პროცესი ჩართულობითი არ ყოფილია.

სტრატეგიისა და გეგმის შინაარს რაც შეეხება, ის არ ასახავს იმ პრობლემებს, რომელიც ასახულია საერთაშორისო რეკომენდაციებში. მიუხედავად იმისა, რომ ფორმალურად 15 -გვერდიანი დოკუმენტი დამტკიცებულია, „ქართული ოცნება“ თვლის, რომ შესრულებულია ეს კონკრეტული საკითხი, ასე ვერ ჩაითვლება. საკვანძო მიმართულებებია შესასრულებელი. იმედს ვიტოვებ, რომ წლის ბოლომდე გააქტიურდება მუშაობა“,- განაცხადა ციმაკურიძემ.

მისივე შეფასებით, ოპოზიციასაც შეეძლო უკეთ ემოქმედა და დარჩენილიყო სამუშაო პროცესში.

„ეს მათი მხრიდან დეპოლარიზაციის მიმართ გამოხატული ნაბიჯი იქნებოდა, მაგრამ ხელისუფლების მხრიდან არ გადადგმულა ნაბიჯები, იმ თვალსაზრისით, რომ სამუშაო ჯგუფები არ იყო გახსნილი დიალოგისთვის.

საუკეთესო გამოსავალი იქნებოდა, გამოიყენო საპარლამენტო ფორმატები, პლენარული სხდომის ტრიბუნა, კომიტეტები, მინისტრების დაბარება. ეს უნდა გახდეს საპარლამენტო ცხოვრების ყოველდღიური რეჟიმი“,- აღნიშნა მან.

ამასთან, ციმაკურიძის თქმით, საპარლამენტო ბოიკოტი გამოსავალი არ არის.

„ხანგრძლივი ბოიკოტი არ არის ეფექტური. ბოიკოტს მოკლევადიანი დანიშნულება და მიზანი აქვს. თუ ბოიკოტი მოკლე ვადაში თავის მიზანს ვერ აღწევს და გადაიზრდება დაუსრულებელ ბოიკოტში - ეს არის დემოკრატიის ხარვეზი. ამიტომ, ასეთ შემთხვევაში პოლიტიკური პარტია უნდა გამოვიდეს ბოიკოტიდან და დაუბრუნდეს სამუშაო პროცესს“,- განაცხადა ციმაკურიძემ.