ნანი ზარანდია ითვლება დაკარგულად და დღემდე ვეძებთ, - ამის შესახებ სტამბოლში მცხოვრებმა ქართველმა, ცირა შარიამ „პალიტრანიუსის“ გადაცემა „360 გრადუსში“ განაცხადა, რითაც უარყო გავრცელებული ინფორმაცია იმის შესახებ, რომ თურქეთში მიწისძვრის შედეგად მესამე გარდაცვლილი ქართველის, ნანი ზარანდიას ცხედარი იპოვეს.

ცირა შარიას თქმით, ნანი ზარანდიას გარდაცვალების შესახებ დაუდასტურებელი ინფორმაცია იმ მოხუცი მამაკაცის ოჯახის წევრმა გაავრცელა, ვისაც ის უვლიდა.

„ითვლება დაკარგულად, დღემდე ვეძებთ. ის მუშაობდა ქალაქ ანთაქიაში, ჰატაის პროვინციაში, ერთ-ერთ ოჯახში. ამ მოხუცის შვილი გვერდით კორპუსში ცხოვრობდა და როცა მოხდა მიწისძვრა, მისი კორპუსი უვნებლად გადარჩა, ბაბუის ჩამოინგრა. მან გაავრცელა ინფორმაცია, რომ ნანი ზარანდია იყო გარდაცვლილი. შემდგომში თქვა, რომ ისე დავიბენი, არა თუ ნანი, მამაჩემიც გარდაცვლილად გამოვაცხადეო. ვვარაუდობთ, რომ ალბათ იყვნენ გარდაცვლილები სხვები და ვეღარ ამოიცნო“, - განაცხადა ცირა შარიამ.