Bild - ვოლოდიმირ ზელენსკიმ ევროკავშირის ქვეყნების ლიდერებს საჭირო იარაღის სიები გადასცა, მაგრამ გერმანიის კანცლერამდე სია არ მისულა
უკრაინის პრეზიდენტმა ვოლოდიმირ ზელენსკიმ ევროკავშირის ქვეყნების ლიდერებს საჭირო იარაღის სიები გადასცა, მაგრამ გერმანიის კანცლერ ოლაფ შოლცამდე სია არ მისულა, - ინფორმაციას ამის შესახებ გერმანული გამოცემა Bild-ი ევროკავშირის მაღალჩინოსანზე დაყრდნობით ავრცელებს.
გამოცემის წყაროს თანახმად, ბრიუსელში ევროპული საბჭოს სამიტზე ზელენსკიმ ევროკავშირის წევრი სახელმწიფოების ლიდერებს უკრაინის შეიარაღებული ძალებისთვის საჭირო იარაღის სიები გადასცა. სიები განსხვავებული იყო - ყოველი ქვეყნისთვის თავისი, მისი სამხედრო შესაძლებლობების გათვალისწინებით.
ავსტრიის კანცლერმა კარლ ნეჰამერმა და ესტონეთის პრემიერ-მინისტრმა კაია კალასმა ზელენსკისგან ასეთი სიების მიღება დაადასტურეს. ამავდროულად, გერმანიის მთავრობაში წყარომ გამოცემას უთხრა, რომ გერმანიის დელეგაციას უკრაინის პრეზიდენტისგან არანაირი სია არ მიუღია.
„სრულიად შესაძლებელია, რომ კანცლერმა ოლაფ შოლცმა და საფრანგეთის პრეზიდენტმა ემანუელ მაკრონმა არ მიიღეს სიები, რადგან სამშაბათს საღამოს პარიზში ზელენსკისთან უკვე გაცვალეს მოსაზრებები”, - წერს გამოცემა.
