სააკაშვილი ჩამოსვლამდეც, 9 წლის მანძილზე თავისუფლად გადაადგილდებოდა და საქართველოსთვის არანაირი ხიფათი არ შეუქმნია, რატომ არ შეიძლება სასჯელი გადაავადონ?! - ამის შესახებ „სტრატეგია აღმაშენებლის“ ერთ-ერთმა წევრმა, პაატა მანჯგალაძემ განაცხადა.

მისივე განმარტებით, „ქართულმა ოცნებამ“ ევროპელი ლიდერების მოწოდებები უნდა გაითვალისწინოს.

„იმ ინფორმაციების გავრცელების შემდეგ, რომ სააკაშვილი ნამდვილად მძიმედაა - 2-მეტრიანი ადამიანი, დაახლოებით, 68 კილოგრამია, მოწამლულია მძიმე მეტალებით, დარიშხანით, ბუნებრივია, მსოფლიო ლიდერებმა დაიწყეს სააკაშვილის გადარჩენაზე ფიქრი, მათ შორის, მეგობარმა პოლონეთის სახელმწიფომ, მეგობარმა უკრაინის ლიდერმა, ზელენსკიმ, სანდუმ.

ბევრი ევროპელი პარლამენტარი, პოლიტიკოსი საუბრობს, რომ თუ გინდათ ევროპა, ქცევაც ისწავლეთ ევროპული, პრეზიდენტის მოკვლა არ არის გზა, რომელიც ევროპამდე მიგიყვანთო. მიუხედავად „ქართული ოცნების“ დამოკიდებულებისა სააკაშვილის მიმართ, სააკაშვილის ფაქტორია ხელისშემშლელი ინტეგრაციის გზაზე. რატომ არ შეიძლება გადაავადონ სასჯელი, რასაც კანონმდებლობა ითვალისწინებს? სააკაშვილი ჩამოსვლამდეც, 9 წლის მანძილზე თავისუფლად გადაადგილდებოდა და საქართველოსთვის არანაირი ხიფათი არ შეუქმნია. აქეთ, ჩვენი ევროპაა, ჩვენი შანსი, შესაძლებლობაა და იქით არის „ქოცების“ გაჯიუტება, რომ სააკაშვილი საპატიმროში მოკლან. რა თქმა უნდა, პოლონეთის მაღალი რანგის წარმომადგენლის, პრემიერ-მინისტრის, უკრაინის პრემიერ-მინისტრის თხოვნები უნდა გავითვალისწინოთ - თუ გვინდა ევროპა, ევროპულად მოქცევა ვისწავლოთ. „ოცნება“ ამას ყურადღებას არ მიაქცევს, თქვენ ნახეთ, გუშინწინ, კობახიძემ კიდევ ერთხელ დაადასტურა, რომ ისინი უკრაინას კი არ გულშემატკივრობენ, რუსეთს გულშემატკივრობენ, რასაც რუსი პროპაგანდისტები ვერ ლაპარაკობენ, ის თქვა ადამიანმა, რომ რუსეთს, თურმე ფრონტზე წარმატება აქვს. რა წარმატებაზეა საუბარი, უკრაინას თითქმის 150 000 ადამიანი ჰყავს რუსეთის განადგურებული. უკრაინაში, სადაც უპირატესობა რუსებს ჰქონდათ, სამხედრო დახმარება, ტექნიკა, ავიაცია მივა და თვალშისაცემი გახდება უკრაინის უპირატესობა, მაგრამ ეს არ უხარია „ქართულ ოცნებას“. „ქართული ოცნება“ ფიქრობს, თუ რუსეთი დამარცხდება, ისინიც დამარცხდებიან“, - განაცხადა მანჯგალაძემ.