საქართველოს პრემიერ მინისტრის, ირაკლი ღარიბაშვილის განცხადებით, საქართველოდან თურქეთში სოლიდური ჰუმანიტარული ტვირთი ორშაბათ-სამშაბათს გაიგზავნება.

ირაკლი ღარიბაშვილმა მიწისძვრით გამოწვეული ტრაგედია თურქ ხალხს და თურქეთის პრეზიდენტს კიდევ ერთხელ მისამძიმრა.

„საშინელი ტრაგედია, რაც თურქეთში მოხდა. მინდა კიდევ ერთხელ მივუსამძიმრო ჩვენს მეგობარ მოძმე ერს, თურქ ხალხს და თურქეთის პრეზიდენტს, ბატონ ერდოღანს. ჩვენ მაქსიმალური მხარდაჭერა უნდა გამოვუცხადოთ თურქ ხალხს. ჩემი გადაწყვეტილებით, უკვე დავავალე შესაბამის უწყებებს და დაიწყეს მზადება სოლიდური ჰუმანიტარული ტვირთის გასაგზავნად, რომელიც თურქეთში ორშაბათს, სამშაბათს გაიგზავნება. ამ მიზნით ჩვენ ერთი მილიონი ლარი გამოვყავით. მთავრობის გარდა კერძო სექტორიც არის მობილიზებული და ჩართული, ასევე პარლამენტი და სხვა უწყებები. ჩვენ მაქსიმალური მხარდაჭერა უნდა აღმოვუჩინოთ თურქ ხალხს. კიდევ ერთხელ მინდა მივუსამძიმრო და გამძლეობა ვუსურვო მათ, დაშავებულებს კი, გამოჯანმრთელება.

ჩვენ პირველივე დღეებში გავგზავნეთ 100 მაშველი. ამ სამუშაოებში ჩართულნი არიან ჩვენი გმირი მაშველები. ქართველმა მაშველებმა ძალიან ბევრი ადამიანის გადარჩენა უკვე შეძლეს. ჩვენ მზად ვართ, რომ კიდევ უფრო მეტი გავაკეთოთ“, - განაცხადა ღარიბაშვილმა.