ვხედავ, რომ მიხეილ სააკაშვილის ჯანმრთელობა ადეკვატურ მდგომარეობაში არ არის, ამას არ სჭირდება ექიმობა ან განსაკუთრებული ექსპერტული ცოდნა, - ამის შესახებ პარტია „ლელოს” პოლიტსაბჭოს წევრმა, გრიგოლ გეგელიამ განაცხადა

მისივე თქმით, საქართველოს მესამე პრეზიდენტის მკურნალობა შესაბამის პირობებში უნდა მოხდეს, რომ მისი სიცოცხლე რისკის ქვეშ არ დადგეს.

„ჩვენი პოზიცია ამასთან დაკავშირებით არის ძალიან ცხადი, თანმიმდევრული და პრინციპული. მიხეილ სააკაშვილს სასჯელი უნდა გადაუვადეს და მისი ტრანსფერი ადეკვატური მკურნალობის მიზნით უნდა მოხდეს. მართლმსაჯულება არის ძალიან მნიშვნელოვანი, მაგრამ მართლმსაჯულება სამართლიანი უნდა იყოს და ადამიანის სიცოცხლე რისკის ქვეშ არ უნდა დადგეს. ამას არა მარტო ჩვენ ვამბობთ, არამედ ექიმები ამბობენ. ამ საკითხზე გადაწყვეტილებას ექიმები უნდა იღებდნენ და არა პოლიტიკოსები.

ჩემი პირადი შთაბეჭდილება, როგორც მოქალაქის არის მძიმე და უსიამოვნო. ვხედავ, რომ მიხეილ სააკაშვილის ჯანმრთელობა ადეკვატურ მდგომარეობაში არ არის, ამას არ სჭირდება ექიმობა ან განსაკუთრებული ექსპერტული ცოდნა და არც მიხეილ სააკაშვილის მოწონება, რომ დაინახო როგორ არის ის. ამ სიტუაციაში ქვეყნისთვის დაუშვებელია მესამე პრეზიდენტი გარდაიცვალოს. მინდა ყველას ესმოდეს, რომ ეს მარტო ერთ ადამიანს ან პარტიას არ ეხება, ეს საქართველოს ეხება. ვიდრე გვიანი იქნება მინდა მეტმა ადამიანმა გაიაზროს, რომ ეს ეხება მთელ სახელმწიფოს“, - განაცხადა გეგელიამ.