სამწუხაროა, რომ თვით პრეზიდენტიც კი გაება მახეში, - ამის შესახებ „ქართული ოცნების“ აღმასრულებელი მდივანი მამუკა მდინარაძე სოციალურ ქსელში წერს, რითაც ეხმაურება მხატვარ სანდრო სულაბერიძის საქმეზე მიმდინარე პროცესებს, მათ შორის საქართველოს პრეზიდენტის „ფეისბუქზე" გამოქვეყნებუ "პოსტს".

მდინარაძის შეფასებით, „თავისი ნახატის გამტაცებლის“ ავტორის „თავგამოდებით დაცვა“, არარსებული დღის წესრიგის შექმნის მცდელობა და „მახეა“.

„ბრძოლა თავისივე მოგონილი პრობლემის აღმოსაფხვრელად - ამ ტრენდის დალაგების და არარსებული დღის წესრიგის შექმნის მცდელობაა თავისი ნახატის გამტაცებლის ავტორის ასე თავგამოდებით დაცვა, განსაკუთრებით იმ დროს, როდესაც მას დასაცავი არაფერი ჭირს. ზუსტად იციან, რომ თავისივე საკუთრების ქურდობაში ბრალი ვერავის დაედება.

აწეული კამპანიაც საზოგადოებაზე არასწორი წარმოდგენის შედეგი და ერთგვარი მახეა ზედმეტად გულუბრყვილო ან ზედმეტად სუბიექტური ადამიანებისთვის.

სამწუხაროა, რომ თვით პრეზიდენტიც კი გაება ამ მახეში", - წერს მდინარაძე "ფეისბუქზე".

შეგახსენებთ, ეროვნულ გალერეაში 4 თებერვალს გახსნილი გამოფენის „ავტოპორტრეტი სარკესთან“ მონაწილე სანდრო სულაბერიძემ საკუთარი ნამუშევარი ჩამოხსნა და მის ადგილას საღებავით კედელზე დაწერა ფრაზა: „ხელოვნება ცოცხალი და დამოუკიდებელია!“. აღნიშნულ საქმეზე შინაგან საქმეთა სამინისტროში გამოძიება სისხლის სამართლის კოდექსის 177-ე მუხლის, მეორე ნაწილის, ა ქვეპუნქტით დაიწყო, რაც გულისხმობს ქურდობას, რომელმაც მნიშვნელოვანი ზიანი გამოიწვია.

სანდრო სულაბერიძის მხარდასაჭერად ეროვნულ გალერეასთან დღეს აქცია გაიმართა, რასაც საქართველოს პრეზიდენტი გამოეხმაურა:

“20 პოლიციის მანქანა ცისფერი გალერეის უკანა ეზოში. მხატვარი ესოდენ საფრთხეს უქმნიდეს სახელმწიფოს????

ცოტა არ იყოს სხვა ეპოქას გვახსენებს და თანამედროვე საქართველოს კი ნამდვილად არცხვენს“, - დაწერა პრეზიდენტმა „ფეისბუქზე“.