არტისტის პერფორმანსზე პოლიციით დევნა სიბრიყვეა, - ამის შესახებ "გირჩის" დეპუტატმა იაგო ხვიჩიამ განაცხადა, რითაც მხატვარ სანდრო სულაბერიძესთან დაკავშირებულ მოვლენებს გამოეხმაურა.

ხვიჩია ამბობს, რომ პოლიტიკური პროტესტის გამოხატვა მათ შორის, ეროვნულ გალერეაშიც შეიძლება და ქურდობას ამაში ვერ ხედავს.

„ავტორმა რაღაც მიაწერა კედელზე, ვიღაც ხალხი იძახის, რომ ეს კრიმინალია, ვიღაცამ თქვა, რომ ქურდობაა. ქურდობა ნიშნავს სხვისი ნივთის ფარულად დაუფლებას, ქურდობა სად იყო იქ, მე არ მესმის, ამიტომ ეს სიბრიყვე მგონია. ბოლოს მიხვდებიან, რომ სიბრიყვესთან აქვთ საქმე და დაანებებენ თავს,"- განაცხადა ხვიჩიამ.

ცნობისთვის, ეროვნულ გალერეასთან, მხატვრის, სანდრო სულაბერიძის მიერ ეროვნულ გალერეაში საკუთარი ნახატის ნაცვლად, დატოვებული წარწერის გამო, შინაგან საქმეთა სამინისტროს მიერ გამოძიების დაწყების გასაპროტესტებლად სახელოვნებო და საზოგადოების სხვა სფეროს წარმომადგენლებმა აქცია გამართეს.

შეგახსენებთ, ეროვნულ გალერეაში 4 თებერვალს გახსნილი გამოფენის „ავტოპორტრეტი სარკესთან“ მონაწილე სანდრო სულაბერიძემ საკუთარი ნამუშევარი ჩამოხსნა და მის ადგილას საღებავით კედელზე დაწერა ფრაზა: „ხელოვნება ცოცხალი და დამოუკიდებელია!“. აღნიშნულ საქმეზე შინაგან საქმეთა სამინისტროში გამოძიება სისხლის სამართლის კოდექსის 177-ე მუხლის, მეორე ნაწილის, ა ქვეპუნქტით დაიწყო, რაც გულისხმობს ქურდობას, რომელმაც მნიშვნელოვანი ზიანი გამოიწვია.