რომ არ ყოფილიყო რაღაც ხელჩასაჭიდი პრემიერის მხრიდან, არ იქნებოდა საუბარი ფასების რეგულირების საკითხზე - სავარაუდოა, რომ პრემიერის ამ ინიციატივას შესაბამისი რეაგირება მოჰყვება,- ამის შესახებ ეკონომისტმა ოთარ ანგურიძემ „კვირას“ პრესკლუბში განაცხადა, რითაც პრემიერის ინიციატივა შეაფასა სურსათსა და ნავთობზე ფასების რეგულირების თაობაზე.

როგორც ეკონომისტი განმარტავს, დროის გარკვეულ მონაკვეთში ფასების შემცირების ტენდენციას უნდა ველოდოთ.

„ბოლო 2 წელია, რაც საქართველოს მუდმივად აქვს მაღალი ეკონომიკური ზრდა. ამ ფონზე, როდესაც ქვეყანაში მაღალი ფასების ტენდენციაა შენარჩუნებული, რა თქმა უნდა, იმის საფუძველს ჰქმნის, რომ ხომ არ ხდება რაიმე მიმართულებით არასწორი ჩარევა, მომხმარებელთა არასწორი დაზიანება.

ჩვენ გასულ წელს პრემიერის 2 ასეთი რეაგირება ვნახეთ. ერთი ეს იყო ფარმაცევტულ ბაზარზე, მეორე კი ნავთობკომპანიებზე. ორივე შემთხვევაში ამან შედეგი გამოიღო.

პრემიერმა ამჯერად დააბარა სპეციალურ სამსახურს, რომ დაიწყონ სასურსათო პროდუქციის ფასების მონიტორინგი. უნდა აღინიშნოს ის ფაქტი, რომ სავარაუდოდ, რომ არ ყოფილიყო რაღაც ხელჩასაჭიდი პრემიერის მხრიდან, არ იქნებოდა ამაზე საუბარი. მოგეხსენებათ, ნებისმიერი კომპანიაა გადასახადის გადამხდელი და შემოსავლების სამსახური მათ საბალანსო, მოგება-ზარალის უწყისებს და შემოსავალ-გასავლის ცხრილებს უყურებს.

კარგად ხედავენ, პროდუქტზე რა სახის მოგების მარჟაა დაწესებული, როგორ განკარგავენ კაპიტალს. სავარაუდოა, რომ პრემიერის ამ ინიციატივას შესაბამისი რეაგირება მოჰყვება. უნდა ვივარაუდოთ, რომ მას შემდეგ, რაც მოხდება კომუნიკაცია ამ სექტორსა და სახელმწიფო უწყებებს შორის, დროის გარკვეულ მონაკვეთში ფასების შემცირების ტენდენცია იქნება. ჩვენთან, საკმაოდ კარგი ეკონომიკური ტენდენცია გვაქვს“,- აღნიშნავს ოთარ ანგურიძე.