„სტრატეგია აღმაშენებლის“ ლიდერმა, გიორგი ვაშაძემ 24 თებერვალს, რუსთაველის გამზირზე დაგეგმილი უკრაინის სოლიდარობის აქციის დეტალებზე ისაუბრა. მისი თქმით, საქართველოში მყოფ უკრაინის მოქალაქეებს სურვილი აქვთ, რომ აქციაზე სიტყვით გამოვიდნენ.
„როგორც უკვე იცით, გამოვედით ინიციატივით, რომ საქართველოში გაიმართოს უკრაინის სოლიდარობის აქცია. დღეს უკრაინის მოქალაქეებს, რომლებიც ერთი წელია იმყოფებიან საქართველოში და რომლებიც ყოველდღიურად გრძნობენ საქართველოს მოქალაქეების მხრიდან დახმარებას, უნდათ, რომ 24 თებერვალს სიტყვით მოგვმართონ.
ისინი არიან ამ შეკრების თანაინიციატორები. ძალიან მნიშვნელოვანია, რომ მოვუსმინოთ და რაც მთავარია, 24 თებერვალს ყველა შევიკრიბოთ იმისთვის, რომ მთელს მსოფლიოს ვაჩვენოთ სად დგას ქართველი ხალხი. ასევე, მთელს მსოფლიოს ვაჩვენოთ რა არის საქართველო, სად არის საქართველო და როგორ უჭერს გულმხურვალედ მხარს უკრაინას, როგორი სოლიდარულია უკრაინელი ხალხის და უკრაინის ამ ბრძოლის თავისუფლებისთვის და იმ ტირანის წინააღმდეგ, რომელიც რუსეთის ფედერაციაში იმყოფება“, - განაცხადა ვაშაძემ.